ट्रम्प यांची मोदींवर स्तुतीसुमने
शुक्रवारी व्हाईट हाऊसमध्ये पत्रकारांशी बोलताना डोनाल्ड ट्रम्प यांनी पंतप्रधान नरेंद्र मोदी यांच्यासोबत असलेल्या आपल्या मैत्रीचा उल्लेख केला. ते म्हणाले, "पंतप्रधान मोदी माझे चांगले मित्र आहेत आणि आम्ही नेहमी बोलत असतो. ते एक महान व्यक्ती आहेत." यावेळी दोन्ही देशांमध्ये व्यापार करारावर बातचीत सुरू असल्याचेही त्यांनी स्पष्ट केले. आपल्या संभाव्य भारत भेटीबद्दल बोलताना ट्रम्प म्हणाले, "पंतप्रधान मोदींना वाटत असेल, तर मी नक्कीच भारतात येईन, आम्ही ते लवकरच निश्चित करू."
advertisement
पुन्हा रशियन तेलाचा 'पुराणा राग'
व्यापार आणि मैत्रीबद्दल बोलत असतानाही, ट्रम्प यांनी पुन्हा एकदा त्यांचा 'जुना राग' आळवला. त्यांनी दावा केला की, भारताने रशियाकडून होणारी तेलाची खरेदी मोठ्या प्रमाणात थांबवली आहे. मात्र, हा दावा करताना त्यांनी अधिक तपशील दिला नाही. यासोबतच, त्यांनी भारत-पाकिस्तान सीझफायरचे श्रेय घेण्याची कोणतीही संधी सोडली नाही.
भारत-पाक सीझफायरवर पुन्हा दावा
भारत आणि पाकिस्तानमधील शस्त्रसंधीबद्दल बोलताना डोनाल्ड ट्रम्प यांनी पुन्हा एकदा जुना दावा केला. "ते दोन्ही देश अणुशक्ती असलेले आहेत. जेव्हा ते लढायला लागले, तेव्हा आठ विमाने पाडली गेली. आधी सात होती, आता आठ आहेत. मी ते युद्ध एका दिवसात थांबवले," असा दावा त्यांनी केला. मात्र, ट्रम्प यांनी नेमक्या कोणत्या बाजूची विमाने पाडली गेली, याचा उल्लेख केला नाही.
भारताकडून ट्रम्प यांचा दावा फेटाळला
विशेष म्हणजे, भारताने यापूर्वीच ट्रम्प यांचा हा दावा स्पष्टपणे फेटाळला आहे. भारत आणि पाकिस्तानमधील शस्त्रसंधीमध्ये अमेरिकेची कोणतीही भूमिका नव्हती, असे भारताने ठामपणे सांगितले आहे. पाकिस्तानने केलेल्या विनंतीनंतरच भारताने स्वतःच्या निर्णयानुसार शस्त्रसंधी मान्य केली होती, असे भारताचे म्हणणे आहे. असे असतानाही ट्रम्प यांनी पुन्हा या सीझफायरचे श्रेय घेण्याचा प्रयत्न केला.