हॅकर्सनी इस्रायलची गुप्त फाइल केली ओपन, नेतन्याहू यांच्या पोटात गोळा आला; इराणच्या हंडाला ग्रुपने अभेद्य कवच भेदले

Unit 9900 मधील इतक्या मोठ्या संख्येने वरिष्ठ अधिकाऱ्यांची ओळख पहिल्यांदाच सार्वजनिक झाली आहे. हंडालाने या लीकला त्या युनिटभोवती निर्माण झालेल्या “अजिंक्यतेच्या मिथकाचा अंत” असे वर्णन केले आहे आणि सायबर युद्धात सहभागी असलेल्या सर्वांना इशाराही दिला आहे.

या अधिकाऱ्यांची ओळख उघड होणे म्हणजे केवळ झायनिस्ट व्यवस्थेच्या अजिंक्यतेच्या मिथकाचा अंत नाही, तर माहिती युद्धात कार्यरत असलेल्या सर्वांसाठी स्पष्ट इशारा आहे. आता अंधार आणि गुप्ततेचा काळ संपला आहे. पुढे कोणताही गुन्हेगार झायनिस्ट सुरक्षेच्या आड लपून राहू शकणार नाही, असे हंडाला गटाने म्हटले आहे.

advertisement

हंडालाने पुढे सांगितले की या कारवाईमुळे इस्रायलच्या लष्करी कारवायांमध्ये सहभागी असलेला कोणताही अधिकारी आता सुरक्षित राहू शकत नाही. त्यांनी इशारा दिला की भविष्यातील कोणत्याही आक्रमणाला प्रतिकार शक्ती आणि सायबर ऑपरेटिव्हकडून प्रत्युत्तर दिले जाईल. अंत जवळ आला आहे, असे म्हणत त्यांनी पुढील कारवाईची वाट पाहण्याचे आवाहन केले.

हंडाला बद्दल...

अमेरिकेच्या न्याय विभागाने (US Department of Justice) 19 मार्च 2026 रोजी प्रसिद्ध केलेल्या अहवालात हंडाला गटाचा उल्लेख केला आहे. या अहवालानुसार हंडाला हा इराणच्या गुप्तचर आणि सुरक्षा मंत्रालयाशी (MOIS) संबंधित डोमेनपैकी एक आहे. 28 फेब्रुवारी 2026 पासून सुरू झालेल्या अमेरिका-इराण संघर्षानंतर या गटाने वैयक्तिक माहिती (PII) प्रकाशित केल्याचे सांगितले गेले आहे.

उदाहरणार्थ: मार्च 2026 मध्ये अमेरिकास्थित एका बहुराष्ट्रीय वैद्यकीय तंत्रज्ञान कंपनीवर झालेल्या मालवेअर हल्ल्याची जबाबदारी हंडालाने स्वीकारली होती.

याशिवाय हंडालाने अलीकडेच FBI संचालक काश पटेल यांच्या वैयक्तिक ईमेल अकाउंटमध्ये हॅकिंग केल्याचा दावा केला होता. या घटनेत त्यांच्या काही वैयक्तिक छायाचित्रांसह कागदपत्रे ऑनलाइन लीक करण्यात आली होती. हॅकर्स आणि FBI दोघांनीही या घटनेची पुष्टी केली आहे.

हंडाला हॅक टीमने आपल्या वेबसाइटवर म्हटले की, काश पटेल यांचे नाव आता यशस्वीपणे हॅक झालेल्या व्यक्तींच्या यादीत समाविष्ट झाले आहे. त्यांनी पटेल यांचे काही वैयक्तिक फोटोही शेअर केले. ज्यामध्ये ते सिगार ओढताना, जुन्या कन्व्हर्टिबल कारमध्ये बसलेले आणि रमच्या बाटलीसह सेल्फी घेताना दिसत आहेत.

इस्रायलचे Unit 9900 काय आहे?

इस्रायल डिफेन्स फोर्सेस (IDF) नुसार, Unit 9900 हे त्यांचे सर्वात विशेष गुप्तचर पथकांपैकी एक आहे. या युनिटमधील रोईम राचोक (Roim Rachok - RR) नावाचा एक गट इतर शाखांसोबत काम करतो.

हा गट उपग्रह चित्रे, नकाशे, ड्रोन डेटा, 3D मॅपिंग आणि शहरी निरीक्षण यांचा वापर करून इस्रायलच्या भौगोलिक परिस्थितीचे विश्लेषण करतो आणि सीमावर्ती सुरक्षा मजबूत करण्यास मदत करतो. त्यांच्या क्षमतांचा उपयोग लष्करी कारवायांमध्ये विशेषतः लक्ष्यित हल्ल्यांसाठी केला जातो.

या कार्यक्रमातील सैनिकांची निवड प्रक्रिया अत्यंत कठीण असते. विशेष म्हणजे या गटातील अनेक सदस्य ऑटिझम स्पेक्ट्रमवर असतात आणि सेवा सवलत मिळू शकत असूनही ते स्वेच्छेने सहभागी होतात. इस्रायलच्या सुरक्षेसाठी गुप्त माहिती गोळा करण्याच्या त्यांच्या समर्पणाचे हे उदाहरण मानले जाते.