TRENDING:
इस्लामाबाद: अमेरिकेने पाकिस्तानला एफ-16 लढाऊ विमानांसाठी अत्याधुनिक तंत्रज्ञान व सहाय्य विक्री करण्यास मंजुरी दिली आहे. या कराराची एकूण किंमत 68.6 कोटी डॉलर इतकी असल्याचे सांगितले जाते. ‘डॉन’ वृत्तपत्रातील अहवालानुसार अमेरिकेच्या डिफेन्स सिक्युरिटी कोऑपरेशन एजन्सी (DSCA) ने सोमवारी संसदेला पाठवलेल्या पत्रामधून या विक्रीस अधिकृत मान्यता दिली.
advertisement
या संरक्षण पॅकेजमध्ये लिंक-16 सिस्टम, क्रिप्टोग्राफिक उपकरणे, एव्हियोनिक्स अपडेट्स, प्रशिक्षण, तसेच एफ-16 ताफ्यासाठी आवश्यक असणारे व्यापक तांत्रिक सहाय्य समाविष्ट आहे. DSCA च्या पत्रामध्ये या विक्रीमागील कारणे स्पष्ट करण्यात आली आहेत. त्यात म्हटले आहे की हा निर्णय अमेरिकेची परराष्ट्र धोरणे आणि राष्ट्रीय सुरक्षा उद्दिष्टांना पाठिंबा देतो. या सहाय्यामुळे पाकिस्तानला दहशतवादविरोधी कारवायांमध्ये, तसेच भविष्यात उद्भवू शकणाऱ्या आकस्मिक परिस्थितींमध्ये अमेरिकन आणि इतर भागीदार देशांच्या सैन्य दलांसोबत इंटर-ऑपरेबिलिटी (परस्पर कार्यक्षमतेचे सुसंवाद) राखण्यात मदत होईल.
प्रस्तावित विक्रीचा उद्देश पाकिस्तानच्या एफ-16 ताफ्याचे आधुनिकीकरण करणे आणि सुरक्षेशी संबंधित अडचणी सोडवण्याचा आहे. परिसरातील सामरिक संतुलन बिघडण्याच्या शक्यतेबद्दल उपस्थित होणाऱ्या प्रश्नांवर DSCA ने स्पष्ट केले की या उपकरणांची विक्री प्रदेशातील मूलभूत लष्करी संतुलन बदलणार नाही.
या संपूर्ण विक्रीपैकी 3.7 कोटी डॉलर मूल्याची प्रमुख प्रतिरक्षा उपकरणे असतील तर उर्वरित 64.9 कोटी डॉलर मूल्याची पूरक सामग्री व तांत्रिक सहाय्य असेल, असेही पत्रात नमूद करण्यात आले आहे.