अभिनेत्री असलेल्या खासदारांची साडीला खास पसंती; सांसदेत काही ड्रेसकोड असतो का?

भारतीय संसदेत अधिकृत आणि लिखित असा कोणताही ड्रेस कोड नाही. मात्र, सभागृहाची गरिमा टिकवण्यासाठी सादगीपूर्ण आणि पारंपरिक पोशाख घालण्याची एक अलिखित परंपरा नक्कीच आहे.

बहुतेक महिला खासदार साडी किंवा सलवार-कुर्ता यासारखे भारतीय पोशाख परिधान करतात. पुरुष खासदार कुर्ता-पायजामा, धोती किंवा सूटमध्ये दिसतात. उदाहरण म्हणून, 2019 मध्ये तृणमूल काँग्रेसच्या खासदार नुसरत जहां यांनी वेस्टर्न पोशाख परिधान केल्यामुळे त्यांच्यावर समाजमाध्यमांकडून टीका झाली होती.

advertisement

सांसद म्हणजे आपल्या मतदारसंघाचं प्रतिनिधित्व करणारे लोक. भारतातील अनेक भागांमध्ये अजूनही पारंपरिक पोशाख लोकांच्या रोजच्या जीवनाचा भाग आहे. त्यामुळे साडी, धोती, कुर्ता यांसारखे पोशाख घालून खासदार आपल्या लोकांशी भावनिक नातं टिकवून ठेवतात. उदाहरणार्थ, ममता बॅनर्जी यांची साधी सूती साडी ही बंगालमध्ये त्यांची साधेपणाची ओळख बनली आहे. उत्तर प्रदेश आणि बिहारमधील अनेक खासदार धोती-कुर्तामध्येच दिसतात, जे स्थानिक लोकांची जीवनशैली आणि संस्कृती दर्शवतात.

काही महिला खासदार खास करून हातमागावर तयार झालेल्या साड्यांची पसंती करतात. डिंपल यादव अनेकदा सौम्य रंगांच्या हँडलूम साड्यांमध्ये पाहायला मिळतात. तर कंगना राणावत ज्या हल्ली भाजपकडून खासदार झाल्या आहेत, त्या आपल्या स्टायलिश हँडलूम साड्यांमुळे चर्चेत असतात. दुसरीकडे, अभिनेत्री आणि भाजप खासदार हेमा मालिनी यांना पारंपरिक कांजीवरम सिल्क साड्यांची विशेष आवड आहे.