Inspirational Story: सैनिक होतं आलं नाही! आता मोफत प्रशिक्षण देऊन 15 मुलांना भारतीय सेनेमध्ये पाठवलं, चहा विकणाऱ्या आकाशची कहाणी

स्वतःच सैनिक होण्याचे स्वप्न भंगल्यानंतर जिद्दीला पेटलेल्या या तरुणाने चहा व्यवसायातून ही प्रगती साधली आहे. जास्तीत जास्त विद्यार्थ्यांना सैनिक आणि पोलीस घडवण्याचे आकाश याचे स्वप्न आहे. आजही तो करिअर अकॅडमीचा संचालक आणि चहा विक्रेता अशा दोन्ही भूमिका बजावतो. पाहुयात त्याचा संघर्षमय प्रवास.

माझे दहावीपर्यंतचे शिक्षण इथेच रामनगर येथे झाले. त्यानंतर मला सेनेत जाऊन भारतमातेची सेवा करायची होती. यासाठी मांडवा येथे करिअर अकॅडमी देखील जॉइन केली होती. परंतु घरची हलाखीची परिस्थिती आणि कोविडमध्ये सुरू झालेले लॉकडाऊन यामुळे भरतीचे वय निघून गेले, असं आकाश सांगतो. 

यानंतर मी उपजीविकेसाठी स्वतःचा चहा विक्रीचा व्यवसाय सुरू केला. हा व्यवसाय सुरू असताना सकाळी अनेक मुले ग्राउंडवर धावताना दिसायची. या मुलांना मी टिप्स देऊ लागलो. माझ्या अनेक टिप्स विद्यार्थ्यांना आवडू लागल्याने त्यांनी आम्हाला तुम्हीच शिकवा असा आग्रह धरला. मी दररोज विद्यार्थ्यांना शिकवू लागलो. एकेक करत आतापर्यंत 13 विद्यार्थी अग्निवीर तर 2 विद्यार्थी बीएसएफमध्ये दाखल झाले. या सर्व 15 विद्यार्थ्यांकडून प्रशिक्षण दिल्याबद्दल एक रुपयाही मी घेतला नाही.

ग्रामीण भागातील विद्यार्थी सेनेत आणि पोलीस सेवेत जावेत यासाठी ग्रामीण भागातच म्हणजेच मानेगाव येथे स्वतःची करिअर अकॅडमी नुकतीच सुरू केली आहे. अत्यंत माफक दरात इथे विद्यार्थ्यांना प्रशिक्षण दिले जाते. चहाचा व्यवसाय देखील रामनगर येथे सुरूच आहे. चहाच्या व्यवसायातून दररोज दीड ते दोन हजारांची निव्वळ कमाई होते. या व्यवसायाच्या बळावरच मी करिअर अकॅडमी स्थापन करू शकलो. आजही दोन्ही व्यवसाय सांभाळत आहे, असे आकाश डोंगरे याने लोकल 18 शी बोलताना सांगितले.

जास्तीत जास्त मुलांना भारतीय सेनेत आणि पोलीस सेवेत पाठवण्याचे आकाशचे स्वप्न आहे. एका करिअर अकॅडमीचा संचालक असून देखील सध्या तो चहाचा व्यवसाय करतो आहे. चहा विक्रीतूनच आपण हे सर्व वैभव उभे करू शकल्याचे आकाश सांगतो. जिद्द, चिकाटी आणि प्रामाणिक मेहनतीच्या बळावर आपण काहीही करून दाखवू शकतो हे आकाश याने सिद्ध करून दाखवले.