जखमी मित्राला रुग्णालयात आणलं, पोलिसांना संशय आला, छ. संभाजीनगरात धक्कादायक कांड समोर

या प्रकरणी पोलीस उपनिरीक्षक वंदना मुळे यांनी तक्रार दिली आहे. शनिवारी दुपारी 12 वाजता त्या कर्तव्यावर असताना घाटी पोलीस चौकीतील पोलीस अंमलदार ए. आर. खिल्लारे यांनी माहिती दिली की, गोळी लागलेल्या अवस्थेत महेश पवारला अझहर सय्यद याने घाटी रुग्णालयात दाखल केले आहे. अझहरने डॉक्टरांना सांगितले होते की, दोघेही रात्री सव्वा अकराच्या सुमारास लिंबेजळगाव टोलनाका ते वाळूजदरम्यान ढोरेगाव फाट्याजवळून मोटारसायकलने जात असताना अज्ञात व्यक्तीने गोळीबार केला आणि त्यात मित्राला गोळी लागली.

पोलीस निरीक्षक शिवचरण पांढरे आणि पोलीस उपनिरीक्षक अजय शितोळे यांनी अझहरची सखोल चौकशी केली. त्यावेळी अझहरने कबुली दिली की, त्याच्या मृत भाऊ इम्रान सय्यद याने आणलेले पिस्तूल व त्यातील 4 राऊंड तो सोबत घेऊन फिरत होता. वाळूज येथील शिवराई फाटा परिसरात, सपना हॉटेलशेजारील मोकळ्या जागेत तो आणि महेश बसले असताना पिस्तूल पाहत असताना चुकून गोळी सुटली. ही गोळी महेशच्या उजव्या पायाच्या मांडीत घुसली.