खोबऱ्याच्या तुकड्यावरून 2 कुटुंबात तुफान राडा, कल्याणमध्ये महिलेला बेदम मारहाण

मिळालेल्या माहितीनुसार, कल्याणमधील पिसवली गावातील एका चाळीमध्ये दोन कुटुंबे राहतात. चाळीतील एका कुटुंबाने रस्त्यावर खोबरे वाळत घातले होते. खेळता खेळता एका ८ वर्षाच्या मुलाने त्यातील एक खोबऱ्याचा तुकडा उचलला. या साध्या गोष्टीवरून शेजारील कुटुंबाने मोठा वाद घातला. वादाचे रूपांतर झटापटीत झाले आणि आरोपींनी लहान मुलाच्या आईला शिवीगाळ करत मारहाण केली.

व्हिडिओ व्हायरल आणि पोलीस कारवाई

या मारहाणीचा सर्व प्रकार एका स्थानिक व्यक्तीने आपल्या मोबाईल कॅमेऱ्यात कैद केला. तो व्हिडिओ आता सर्वत्र पसरला आहे. या व्हिडिओमध्ये महिलेला कशा प्रकारे अमानुष मारहाण केली जात आहे, हे स्पष्टपणे दिसत आहे. या घटनेप्रकरणी पीडित महिलेने पोलिसांत धाव घेतली आहे. मानपाडा पोलिसांनी या प्रकरणी अदखलपात्र (NC) गुन्ह्याची नोंद केली आहे. किरकोळ कारणावरून एका महिलेला अशा प्रकारे मारहाण झाल्यामुळे परिसरात संताप व्यक्त केला जात आहे.