जिमला जायचं होतं पण आडबाजुला नेलं, सोबत चाकू अन् ॲसिड, कल्याणमध्ये रॅपिडो चालकाचं तरुणीसोबत भयंकर कृत्य

कल्याण पश्चिमेतील सिंधी गेट परिसरात ही धक्कादायक घटना घडली. प्राथमिक माहितीनुसार, संबंधित तरुणीने सायंकाळी जिमला जाण्यासाठी रॅपिडो मोटरसायकल बूक केली होती. मात्र चालकाने तिला जिममध्ये न सोडता कल्याण पश्चिमेतील पोलीस लाईनजवळील अंधाराच्या ठिकाणी नेलं. तिथे चालकाने तिच्याशी अश्लील वर्तन करत तिच्यावर अतिप्रसंग करण्याचा प्रयत्न सुरू केला.

यावेळी तरुणीने स्वतःचा बचाव करत आरडाओरडा केला तरुणीचा आवाज ऐकून परिसरातील नागरिक एकत्र आले. त्यांनी विचारपूस केली असता तरुणीने तिच्यासोबत घडलेला प्रकार नागरिकांना सांगितला. यानंतर संतप्त झालेल्या नागरिकांनी आणि तरुणीने संबंधित रॅपिडो चालकाला पकडून भररस्त्यात चोप दिला. या घटनेचा व्हिडीओ समोर आला असून सोशल मीडियावर व्हायरल झाला आहे. या व्हिडीओमध्ये संबंधित तरुणी आरोपीकडे चाकू आणि अॅसिड असल्याचा दावा करत आहे.

घटनेची माहिती मिळताच पोलिसांनी तातडीने घटनास्थळी धाव घेत परिस्थिती नियंत्रणात आणली. सध्या पोलिसांकडून तरुणीची तक्रार नोंदवण्याची प्रक्रिया सुरू असून, आरोपी चालकाविरोधात पुढील कारवाई करण्यात येत आहे. मात्र या घटनेमुळे परिसरात भीतीचे वातावरण पसरले असून, महिलांच्या सुरक्षेचा प्रश्न पुन्हा एकदा ऐरणीवर आला आहे.