Solapur: सुरक्षारक्षकानं 17 व्या मजल्यावरून खाली आणलं, पण ‘त्या’ कारणानं सगळं संपलं, धक्कादायक माहिती समोर

सुरक्षा रक्षकाला याबाबत माहिती मिळताच त्याने प्रसंगावधान राखून 17 व्या मजल्यावर धाव घेतली. सदारंगानी यांना समजावत सुरक्षितपणे खाली आणले. परंतु, सदारंगानी यांनी “माझ्या गाडीची चावी वरच राहिली आहे, ती घेऊन येतो”, अशी बतावणी करून पुन्हा 17 वा मजला गाठला. तसेच सुरक्षारक्षकाला काही समजण्याच्या आतच थेट खाली उडी घेतली. अचानक घडलेल्या या घटनेने सर्वत्र खळबळ उडाली.

सुनील सदारंगानी हे दुपारच्या सायंकाळी चारचाकी वाहनाने घटनास्थळी आले होते. पनाश अपार्टमेंटच्या पार्किंगमध्ये गाडी लावून ते लिफ्टचा वापर न करता पायऱ्यांवरूनच वरच्या मजल्यांवर गेले होते. सुरुवातीला त्यांना कुणीही ओळखले नव्हते. मात्र, नंतर गाडीच्या नंबरप्लेटवरून पोलिसांना त्यांची ओळख पटली.

सुनील मोतीलाल सदारंगानी (वय 58) हे सोलापुरातील प्रसिद्ध मुलतानी बेकरीचे मालक आणि उद्योजक होते. सोलापुरातील प्रसिद्ध व्यक्तिमत्व असणारे राजकुमार राठी यांचे ते जावई होते. व्यवसाय आणि उद्योगामुळे त्यांचा सोलापुरातील नामवंत व्यक्तींशी दांडगा संपर्क होता. परंतु, गेल्या काही काळापूर्वी मुलतानी बेकरी बंद झाली होती. त्यानंतर ते पुण्यातील खराडी भागात स्थायिक झाले होते. गेल्या चार दिवसांपूर्वीच ते पत्नीसह सोलापुरात आले होते आणि त्यांचा पुन्हा सोलापुरातच स्थायिक होण्याचा मानस होता.