लग्नाचं वऱ्हाड नेण्यासाठी रेल्वेचा संपूर्ण कोच बुक करायचा की सीट? काय स्वस्त पडतं?

रेल्वेचा संपूर्ण डबा बुक करण्याच्या तुलनेत सीट बुक करणं स्वस्त असलं तरी यामध्ये एक समस्या आहे. ती म्हणजे एका पीएनआरमध्ये सहा पेक्षा जास्त तिकिटं बुक करता येत नाहीत. त्यामुळे वेगवेगळी तिकिटं काढावी लागतील आणि यामध्ये वेगवेगळ्या डब्यांमध्ये देखील जागा मिळू शकते. जरी तुम्ही एका डब्यातील सर्व 72 तिकिटं काढण्यासाठी 12 जण रांगेत उभे केले, तरी तुम्हाला एकाच डब्यातील सर्व तिकिटं मिळतील, याची खात्री नाही. कारण रेल्वे तिकीट बुकिंग एकाच वेळी ऑफलाइन आणि ऑनलाइन सुरू असतं.

रेल्वेचा डबा किंवा संपूर्ण रेल्वेचं बुकिंग फुल टेरिफ रेट म्हणजेच एफटीआरवर केलं जातं. यामध्ये प्रति डबा 50 हजार रुपये सिक्युरिटी चार्ज द्यावा लागतो. प्रवासाच्या सुरुवातीच्या स्थानापासून शेवटच्या स्थानापर्यंतचे येण्या-जाण्याचं भाडं द्यावं लागतं. प्रवासासाठी 30 टक्के सर्व्हिस चार्जदेखील भरावा लागतो. प्रवास किमान 200 किमी असावा लागतो. गाडी इतर ठिकाणी थांबवल्यास त्याचे चार्ज वेगळे भरावे लागतात. यासोबतच एसी आणि फर्स्ट क्लास डब्याच्या बुकिंगसाठी पाच टक्के जीएसटी भरावा लागतो. सुपरफास्ट गाडीतील डबा असल्यास सुपरफास्ट चार्ज द्यावा लागतो. जर तुम्ही संपूर्ण रेल्वे गाडीचं बुकिंग केलं, तर इंजिन स्टॉपिंग चार्जेस देखील भरावे लागतात.

रेल्वेचा डबा किंवा संपूर्ण रेल्वे बुक करण्यासाठी आयआरसीटीसीच्या मध्यम किंवा विभागीय किंवा मुख्य ऑफिसमध्ये जावे लागेल. येथे एकूण बुकिंगच्या पाच टक्के चार्ज भरावा लागेल. बुकिंग किमान एक महिना अगोदर करावी लागेल.