Health Tips: साधा की खपली गहू, आरोग्यासाठी काय चांगलं? मधुमेह असणाऱ्यांनी काय खावं?

साधा गहू मोठ्या प्रमाणावर शेतीमध्ये घेतला जातो. या गव्हापासून तयार होणारी पोळी मऊ, पांढरी आणि पटकन फुलणारी असते. त्यामुळे अनेक कुटुंबांमध्ये साध्या गव्हाची पोळी अधिक पसंत केली जाते. मात्र या गव्हामध्ये ग्लूटनचे प्रमाण जास्त असते. त्यामुळे काही लोकांना पोटफुगी, अपचन, आम्लपित्त किंवा वजन वाढण्यासारख्या समस्या जाणवतात. विशेषतः मधुमेह असलेल्या रुग्णांसाठी साध्या गव्हाची पोळी रक्तातील साखर लवकर वाढवू शकते.

खपली गहू हा हजारो वर्षांपूर्वीपासून आपल्या देशात वापरात आहे. या गव्हामध्ये तंतुमय घटक म्हणजेच फायबर भरपूर प्रमाणात असते. त्यामुळे पचनक्रिया सुधारते, पोट जास्त वेळ भरलेले राहते आणि वारंवार भूक लागत नाही. खपली गव्हाचा सर्वात मोठा फायदा म्हणजे याचा ग्लायसेमिक इंडेक्स कमी असतो. म्हणजेच याची पोळी खाल्ल्यानंतर रक्तातील साखर हळूहळू वाढते. त्यामुळे मधुमेह असलेल्यांसाठी खपली गहू अधिक सुरक्षित मानला जातो.

जर तुम्हाला पोटाचे विकार, मधुमेह, वजन नियंत्रण किंवा दीर्घकाळ आरोग्य टिकवायचे असेल, तर खपली गहू अधिक फायदेशीर ठरतो. मात्र मेहनतीचे काम करणारे, जास्त ऊर्जा लागणारे लोक किंवा ज्यांना कोणतीही पचनाची तक्रार नाही, त्यांच्यासाठी साधा गहू देखील योग्य आहे. शक्य असल्यास आठवड्यात काही दिवस खपली गहू आणि काही दिवस साधा गहू, असा समतोल ठेवणे आरोग्यासाठी अधिक चांगले ठरू शकते.