Mumbai Accident : बड्या बापाच्या मुलाचा नाद जीवावर बेतला? सुखी संसार उद्ध्वस्त होण्याची वेळ, विद्याविहारला भयंकर थरार

मिळालेल्या माहितीनुसार, 05 फेब्रुवारी रोजी मुंबईतील विद्याविहार भागात एका अल्पवयीन मुलाने भरधाव गाडी चालवत दुचाकीवरून जाणाऱ्या दाम्पत्याला चिरडलं. सोमय्या कॉलेजच्या गेट क्रमांक 03 बाहेर हा अपघात घडला असून या अपघातात दुचाकीस्वार गंभीर जखमी झाले आहेत. अल्पवयीन मुलगा किया सेलटास कार चालवत होता पण कारवरचा त्याचा ताबा सुटला आणि त्याने दुचाकीवून जाणाऱ्या दाम्पत्याला जोरदार धडक दिली.

जखमींचं नाव ध्रुमिल पटेल आणि मिनल पटेल असून दोघांनाही जबर मार लागला आहे. ध्रुमिलच्या डोक्याला मार लागला असून बरगड्या आणि हाताला फ्रॅक्चर आहे तर मीनलचा डोक्याला आणि गुप्तांगाला गंभीर इजा झाली असून हात फ्रॅक्चर झाला आहे.

विद्याविहार परिसरात झालेल्या अपघातानंतर अल्पवयीन कार चालकाला स्टंट करण्याचा नाद होता का असा संशय व्यक्त केला जात आहे. संबंधित मुलाचे कार-बाईक स्टंट करतानाचे अनेक व्हिडिओ News18 मराठीच्या हाती लागले आहेत.