Mumbai-Pune Missing Link : महाराष्ट्र दिनी मुंबई-पुणे मिसिंग लिंक वाहतूकीसाठी खुला; पण 'या' वाहनांवर असणार बंदी

एमएसआरडीसी यांच्या माध्यमातून पुणे-मुंबई द्रुतगती मार्गावरील मिसिंग लिंक प्रकल्पाचे काम अंतिम टप्प्यात आले आहे. हा नवीन बोगदा 1 मेपासून वाहतुकीसाठी खुला करण्यात येणार आहे. त्यामुळे घाटातील वाहतूक कोंडी कमी होईल आणि प्रवासाचा वेळ सुमारे 20 ते 25 मिनिटांनी कमी होणार.

मात्र प्रवाशांच्या सुरक्षेला प्राधान्य देत बोगद्यातून ज्वलनशील इंधन, अतिज्वलनशील पदार्थ आणि धोकादायक रसायनांची वाहतूक करणाऱ्या टँकरना प्रवेश दिला जाणार नाही. आंतरराष्ट्रीय एडीआर सुरक्षा नियमांनुसार या बोगद्याला 'ई' वर्गवारी देण्यात आली आहे. त्यामुळे अशा वाहनांना पर्यायी मार्गानेच जावे लागेल. याबाबत लवकरच वाहतूक आणि महामार्ग पोलिसांना अधिकृत सूचना दिल्या जाणार आहेत.

हा बोगदा 10 किलोमीटरपेक्षा जास्त लांबीचा आहे. बोगद्याच्या प्रवेशद्वारावर अत्याधुनिक आयटीएमएस आणि एनपीआर कॅमेरे बसवले जाणार आहेत. नियम मोडणाऱ्या वाहनांची माहिती त्वरित नियंत्रण कक्षाला मिळेल तसेच इंधन गळती टाळण्यासाठी विशेष सांडपाणी व्यवस्था आणि अग्निरोधक काँक्रीटची सुविधा देण्यात आली आहे. त्यामुळे आपत्कालीन परिस्थितीतही सुरक्षितता सुनिश्चित होणार आहे.