कारमध्ये बसल्यावर AC कधी चालू केला पाहिजे? तुम्ही ही चूक तर करत नाही ना?

काही भागांमध्ये आता पावसाने हजेरी लावली आहे. त्यामुळे उन्हाच्या झळांपासून काहीसा दिलासा मिळाला आहे; मात्र देशाच्या अनेक भागांमध्ये अजूनही उष्णतेची लाट नागरिकांना हैराण करत आहे. त्यामुळे कुठेही जायचं असेल तर कोणीही आपल्या कारला पसंती देतं. त्याचं मुख्य कारण कारचा एसी हे आहे.

बाहेर ऊन लागत असताना कारमधून निघालेली व्यक्ती सगळ्यात आधी कुठलं काम करत असेल तर ते म्हणजे एसी चालू करणं. घामाच्या धारा लागणाऱ्या उन्हातून कारमध्ये बसताच एसी सुरू करणं हे अगदी नैसर्गिक झालं आहे. या कृतीमुळे लगेच गारवा मिळतो हे खरं असलं तरी तुमच्या आरोग्यासाठी ते अजिबात योग्य नाही, हे तुम्ही जाणता का?

एका इंग्लिश वेबसाइटने याबाबतीत एका तज्ज्ञाशी संवाद साधला. कारमध्ये बसताच एसी सुरू करणं हे कार वापरणाऱ्यांच्या आरोग्यासाठी योग्य नसल्याचं हे तज्ज्ञ सांगतात. असं केल्यामुळे तुमच्या नकळत तुम्ही फुप्फुसांवर परिणाम करत आहात असा इशारा ते देत आहेत.

तज्ज्ञ सांगतात, “तुम्ही कार उन्हात पार्क करता आणि त्यात जाऊन बसता तेव्हा खूप गरम होतं. त्यामुळे तुमचा हात आपोआप एसीच्या बटणाकडे जातो आणि तुम्ही एसी सुरू करता; पण मी एक डॉक्टर असल्यामुळे असं न करण्याचा सल्ला देईन. तुमच्या फुप्फुसांच्या तापमानापेक्षा तुमच्या कारचं तापमान जास्त असतं. त्यामुळे तुमच्या फुप्फुसांना इजा होऊ शकते. म्हणूनच लगेच एसी सुरू करू नका.”

तुम्हाला धुळीच्या ॲलर्जीचा त्रास असेल तर कारमध्ये बसताच एसी सुरू करणं हिताचं नाही. कारच्या खिडक्या उघडा. आतलं तापमान थोडं थंड व्हायची वाट बघा. त्यानंतर एसी सुरू करा. डॉक्टर सांगतात, “कारच्या आतल्या हवेत शुष्कपणा असतो, धूळही असते. एसी व्हेंट नियमित साफ केलेला नसेल तर त्यात धूळ साचण्याची शक्यता जास्त असते.

तुम्ही कारमध्ये जाताच एक नकोसा वास नाकात शिरतो. अशा दूषित हवेत राहिल्यामुळे शिंका, ॲलर्जी, नाक आणि घशाचा संसर्ग, अस्थमा, श्वसनविकार असे त्रास होऊ शकतात,” असा इशाराही डॉक्टर देतात.

कारच्या आतल्या हवेचा दर्जा त्या कारच्या ब्रॅंडवर अवलंबून असतो. प्रीमियम वाहनांच्या आत क्लीनर व्हेंट आणि धूळ रोखणारी यंत्रणा असते; मात्र कारच्या सर्वसाधारण मॉडेल्समध्ये एसी लावताच केमिकल्स निघण्याचा धोका असतो.

तुम्हाला आरोग्याच्या बाबतीत तडजोड करायची नसेल, फुप्फुसं निरोगी ठेवायची असतील तर कारचे व्हेंटिलेशन डक्ट्स नियमित स्वच्छ करणं आवश्यक आहे, असा सल्लाही डॉक्टरांकडून दिला जातो.