Sugar Vs Salt : तुम्ही दह्यात साखर टाकून खाता की मीठ? दोन्हीतलं जास्त फायद्याचं काय माहितीये?

उन्हाळ्यात दही, ताक आणि लस्सी हे पदार्थ लोक मोठ्या प्रमाणावर खातात. ते शरीरासाठी खरंच फायदेशीरही असतात. पण दही साखर घालून खाणं जास्त फायदेशीर आहे की मीठ घालून. या एका प्रश्नाच्या उत्तराने तुमच्या आरोग्याला अनेक फायदे होऊ शकतात. चला पाहूया.

तुमची पचनक्रिया कमकुवत असेल आणि तुम्हाला ती सुधारण्याची असेल तर तुम्ही दह्यात मीठ घालून खायला हवं. मीठ घातलेलं दही पचनक्रिया सुधारण्यास, शरीरातील उष्णता कमी करण्यास आणि वजन कमी करण्यासाठी फायदेशीर असतं.

उन्हाळ्यात बहुतेक लोकांना जास्त भूक लागत नाही. त्यामुळे ते एखाद्यावेळेचं जेवण स्किप करतात किंवा मग कमी कमी जेवतात. मात्र यामुळं शरीरात ऊर्जा फारशी राहात नाही. अशावेळी तुम्ही साखर किंवा गूळ घातलेलं दही खायला हवं. यामुळं तुम्हाला त्वरित ऊर्जा मिळते.

काही लोकांच्यामते मीठ घातल्यामुळे दह्यामधील चांगले जिवाणू म्हणजेच गुड बॅक्टेरीया मरतात. यामुळेच मीठ घातलेलं दही कमी प्रमाणात खावं असं मानलं जातं. मर्यादित प्रमाणात खाल्ल्यास यामुळेही शरीराला फायदेच होतात.

साखर घातलेलं दही सर्वोत्तम मानलं जातं. कारण साखरेमुळे दह्यातील गुड बॅक्टेरीया सुरक्षित राहतात, जे आपल्या शरीरासाठी फायदेशीर असतात. म्हणून साखर घालून दही खाणे पचनसंस्थेसाठी चांगलं असतं.

परंतु साखर अर्थातच सर्वांसाठी चांगली असू शकत नाही. ज्या लोकांना मधुमेह त्यांनी तर साखर घातलेले दही खाऊच नका. त्याचप्रमाणे ज्या लोकांना हाय बीपीच त्रास आहे त्यांनी मीठ घातलेलं दही शक्यतो खाऊ नका.

शेवटी दही कसं खावं, त्यामध्ये साखर घालावी की मीठ हे आपल्या आवडीनुसार आणि आपल्या शारीरिक परिस्थितीनुसार बदलतं. दह्यामुळे कोणत्याही प्रकारचा त्रास झाल्यास त्वरित डिक्टरांचा सल्ला घेणंही आवश्यक असतं. (Disclaimer : या बातमीत दिलेली माहिती आणि सल्ला तज्ञांशी झालेल्या संभाषणांवर आधारित आहे. ही सामान्य माहिती आहे, वैयक्तिक सल्ला नाही. म्हणून कोणत्याही सल्ल्याचे अनुसरण करताना तज्ज्ञांचा सल्ला घ्यावा. कोणतेही नुकसान झाल्यास त्यासाठी न्यूज-18 जबाबदार राहणार नाही.)