Vidarbha Alert: विदर्भात हवामानाची विचित्र स्थिती, नागपूरसह या जिल्ह्यांना मोठा अलर्ट, 24 तास महत्त्वाचे!

विदर्भात गेल्या काही दिवसांत तापमानात काहीशी घट बघायला मिळाली. मात्र, आता पुन्हा तापमानात वाढ होताना दिसून येत आहे. त्यामुळे विदर्भावर दुहेरी संकट घोंघावत असून कुठं उष्णतेची लाट तर कुठं अवकाळी अलर्ट देण्यात आला आहे.

नागपूर, वर्धा, भंडारा, गोंदिया, चंद्रपूर, गडचिरोली, यवतमाळ या सर्व जिल्ह्यांना आज 29 एप्रिलसाठी पावसाचा यलो अलर्ट जारी करण्यात आला आहे. याठिकाणी विजांच्या कडकडाटासह आणि सोसाट्याच्या वाऱ्यासह पावसाची शक्यता असल्याचं हवामान विभागानं सांगितलंय.

नागपूरमधील कमाल तापमान 43 अंश सेल्सिअस तर किमान तापमान 24 अंश सेल्सिअस इतके असण्याची शक्यता आहे. आज नागपुरात वादळी वाऱ्यासह आणि विजांच्या कडकडाटासह पावसाची शक्यता वर्तवण्यात आली आहे. त्याचबरोबर पुढील काही दिवस पावसाची शक्यता कायम राहणार असल्याची माहिती हवामान विभागानं दिली आहे.

अमरावतीमधील कमाल तापमान 43 अंश सेल्सिअस तर किमान तापमान 27 अंश सेल्सिअस इतके असण्याची शक्यता आहे. अकोला येथील कमाल तापमान 44 अंश तर किमान 27 अंश सेल्सिअस इतके राहील. दोन्ही जिल्ह्यांत दुपारी किंवा सायंकाळनंतर सामान्यतः ढगाळ आकाश असू शकतं.

वर्धा आणि चंद्रपूर येथील कमाल तापमान 43 अंश सेल्सिअस तर किमान तापमान 26 अंश सेल्सिअस इतके असण्याची शक्यता आहे. दोन्ही जिल्ह्यांत वादळी वाऱ्यासह आणि विजांच्या कडकडाटासह पावसाची शक्यता हवामान विभागानं वर्तवली आहे.

गोंदिया जिल्ह्यातील कमाल तापमान 39 अंश सेल्सिअस तर किमान तापमान 24 अंश सेल्सिअस इतके असण्याची शक्यता आहे. याठिकाणी वादळी वाऱ्यासह आणि विजांच्या कडकडाटासह पावसाची शक्यता आहे. बुलढाणा जिल्ह्यातील कमाल तापमान 42 अंश तर किमान तापमान 27 अंश सेल्सिअस इतके राहील.

विदर्भात विजांच्या कडकडाटासह पावसाची शक्यता असल्यानं त्यापासून सावधगिरी बाळगण्याचे आवाहन हवामान विभागाकडून करण्यात आले आहे. विदर्भातील सतत बदलत्या हवामानाचा परिणाम शेतीवर होताना दिसून येत आहे. त्यामुळे शेतकऱ्यांनी शेतीचे योग्य नियोजन करावे.