IAS Pooja Khedkar : आयएस पूजा मॅडमचा नवीन 'कार'नामा; जॉईन व्हायच्या आधीच... धक्कादायक WhatsApp चॅट समोर!

पुणे : प्रशिक्षणार्थी आयएएस अधिकारी पूजा खेडकर आता चांगल्याचं वादात सापडल्या आहेत. प्रोबेशन काळातच पूजा खेडकर यांनी स्वतंत्र ऑफिस, गाडीवर अंबर दिवा, दिमतीला शिपाई अशा नियमबाह्य मागण्या केल्या, यानंतर पूजा खेडकर यांची वाशिमला बदली करण्यात आली. पूजा खेडकर यांच्याबद्दलचा पुण्याचे जिल्हाधिकारी डॉ. सुहास दिवसे यांनी शासनाला पाठवलेला 25 पानी रिपोर्ट समोर आला आहे. या रिपोर्टमध्ये व्हॉट्सऍप चॅटबद्दलचे धक्कादायक खुलासे करण्यात आले आहेत.

खेडकर यांच्या बंगल्यात झाकून ठेवण्यात आलेली ऑडी कार पूजा खेडकर या पुणे जिल्हाधिकारी कार्यालयात जाण्यासाठी वापरत होत्या. या कारवर त्यांनी महाराष्ट्र शासन अशी पाटी लावली होती आणि नारिंगी रंगाचा दिवा लावला होता. पोलीसांच्या मते हा वाहतूक नियमांचा भंग असून पोलिसांनी 177 अंतर्गत कारवाई कारवाई करायचं ठरवलंय. त्यासाठी पुणे पोलिस खेडकर यांच्या बाणेर रस्त्यावरील बंगल्यासमोर आले असता पुजा खेडकर यांच्या आई मनोरमा खेडकर यांनी दरवाजा उघडण्यास नकार दिला. पुणे पोलिसांनी खेडकर यांना वॉट्स ऍपवर नोटीस पाठवलीय. या नोटीशीत MH -12 AR 7000 क्रमांकाच्या या गाडीचा उपयोग नियमबाह्य पद्धतीने करण्यात आल्याने तपास करायचा आहे, असं सांगत ही गाडी चतुःश्रृंगी पोलिस ठाण्याच्या वाहतूक विभागात जमा करण्यास सांगण्यात आलंय.