प्रवास जलद होणार, पण पुणेकरांना 'मोठी किंमत' मोजावी लागणार; मेट्रोच्या विस्तारासाठी हजारो झाडं पाडणार!

पुणे: शहराच्या सार्वजनिक वाहतुकीचा कणा ठरू पाहणाऱ्या पुणे मेट्रोच्या विस्तार कामासाठी पुन्हा एकदा मोठ्या प्रमाणावर वृक्षतोड होणार आहे. मेट्रोमुळे पुणेकरांचा प्रवास जरी जलद आणि सुखाचा होत असला तरी वृक्षतोडीमुळे पर्यावरणाचं मात्र मोठं नुकसान होणार आहे. मेट्रोच्या विविध विस्तारित मार्गांच्या कामात सुमारे २३८६ झाडे अडथळा ठरत असून ती तोडली जाणार आहेत. वृक्ष संरक्षण कायद्यानुसार या बदल्यात तब्बल ४१ हजार झाडे लावणे महामेट्रोवर बंधनकारक आहे. मात्र या अवाढव्य वृक्षलागवडीसाठी पुण्यात पुरेशी मोकळी जागाच उपलब्ध नसल्याचे समोर आले आहे.