उन्हाळ्याआधीच पुणेकरांच्या घशाला कोरड! पाणी जपून वापरा, शहरातील या महत्त्वाच्या भागात पाणीपुरवठा कपातीचा निर्णय

सुमारे आठ महिन्यांपूर्वी वानवडी परिसराला दररोज १० एमएलडी पाणी मिळत होते. लोकसंख्या वाढत असताना पाणीपुरवठा वाढवणे गरजेचे होते, मात्र प्रशासनाने तो चक्क ९ एमएलडीपर्यंत कमी केला आहे. आधीच अपुरा वाटणारा पुरवठा आता आणखी कमी झाल्याने सामाजिक कार्यकर्ते प्रफुल्ल जांभूळकर यांनी यासंदर्भात पुणे महानगरपालिका आयुक्त आणि लष्कर पाणीपुरवठा विभागाला लेखी पत्र देऊन ही कपात अन्यायकारक असल्याचे म्हटले आहे.

पाणी कपातीचा थेट परिणाम वानवडी गाव, होले मळा, जांभूळकर मळा, तात्या टोपे सोसायटी परिसर आणि एसव्हीनगर या भागांवर झाला आहे. या ठिकाणी पाणी इतक्या कमी दाबाने येत आहे की, नागरिकांना दैनंदिन गरजांसाठी मोठी कसरत करावी लागत आहे. विशेषतः गृहिणींचे वेळेचे नियोजन कोलमडले असून, परिसरात टंचाईची तीव्रता अधिकच वाढली आहे.

लष्कर पाणीपुरवठा विभागाचे कार्यकारी अभियंता राजेश शिंदे यांनी यावर स्पष्टीकरण दिले आहे. "वरिष्ठ अधिकाऱ्यांच्या आदेशानुसार संपूर्ण शहराच्या पाणीपुरवठ्यात काही प्रमाणात कपात करण्यात आली आहे. सध्या पाणीपुरवठा सुरू असून, ज्या ठिकाणांहून कमी दाबाच्या तक्रारी येत आहेत, त्यांचे निरसन करण्याचा प्रयत्न सुरू आहे," असे त्यांनी सांगितले.