प्रवाशांसाठी गुड न्यूज, पुणे–हडपसरहून झांसीसाठी 2 विशेष गाड्या धावणार, चेक करा वेळापत्रक

पुणे: रेल्वे प्रशासनाकडून एक महत्त्वाची घोषणा करण्यात आली आहे. पुण्यात अनेक इतर राज्यांतील नागरिक कामानिमित्त वास्तव्यास आहेत. सणासुदीच्या काळात हे नागरिक मोठ्या संख्येने आपल्या गावी जात असल्याने रेल्वे वाहतुकीवर अतिरिक्त ताण येतो. ही बाब लक्षात घेऊन होळीच्या काळात प्रवाशांची गैरसोय टाळण्यासाठी रेल्वे प्रशासनाने पुणे आणि हडपसर येथून वीरांगना लक्ष्मीबाई झाशीपर्यंत मार्च महिन्यात दोन साप्ताहिक विशेष गाड्या चालवण्याचा निर्णय घेतला आहे. दोन्ही गाड्यांमध्ये सेकंड एसीचा एक डबा, थर्ड एसीचे तीन डबे, स्लीपरचे सात डबे आणि सामान्य श्रेणीचे चार डबे असणार आहेत. ठराविक तारखांना एक विशेष गाडी पुण्याहून तर दुसरी हडपसरहून रवाना होणार आहे.