BCCI च्या पत्रानंतर बांग्लादेश क्रिकेट बोर्डात भूकंप! 24 तासाच चार बड्या डायरेक्टर्सने सोडलं पद! चाललंय काय?

विशेष म्हणजे, यातील बहुतांश सदस्यांनी बोर्डात 6 महिनेही पूर्ण केले नाहीत, त्यामुळे प्रशासनाच्या स्थिरतेवर मोठे प्रश्नचिन्ह निर्माण झाले आहे. शनिवारच्या बोर्ड मीटिंगनंतर सनियान तनीम, मेहराब आलम, फैयाजुर रहमान आणि मंजुरुल आलम यांनी राजीनामा देण्याचा निर्णय घेतल्याने क्रिकेट वर्तुळात खळबळ उडाली आहे. इतकी उलथापालथ होऊनही बीसीबीचे प्रेसिडेंट अमीनुल इस्लाम मात्र पदावरून हटण्यास तयार नसल्याने अनेकांच्या भूवया उंचावल्या आहेत.

"मी शेवटपर्यंत पदावर राहीन," असा पवित्रा अमीनुल इस्लाम यांनी घेतला आहे. गेल्या वर्षीच्या निवडणुकीत सत्तेचा गैरवापर केल्याचे आरोप त्यांच्यावर झाले होते, ज्याचा चौकशी अहवाल आता सरकारला सादर करण्यात आला आहे. बोर्डावर सध्या स्पोर्ट्स मिनिस्ट्रीचा मोठा दबाव असून राजकीय हस्तक्षेप आणि घराणेशाहीच्या आरोपांमुळे अमीनुल यांच्या अडचणीत वाढ झाली आहे. त्यानंतर आता त्यांना आपली भूमिका बदलावी लागेल की काय? असा सवाल विचारला जातोय.

आयसीसीमध्ये काम करण्याचा अनुभव गाठीशी असल्यानेच मी या पदावर आहे आणि देशासाठी मी अनेक गोष्टींचा त्याग केला आहे, असं अमीनुल म्हणाले. अमीनुल यांच्या मते, बोर्डातील त्यांची टीम अत्यंत प्रामाणिक आणि डेडिकेटेड असून त्यांच्या मदतीनेच त्यांना बांगलादेश क्रिकेटची सेवा करायची आहे. अमीनुल इस्लाम यांचा हा प्रवास मे 2025 मध्ये सुरू झाला होता, जेव्हा त्यांनी फारूक अहमद यांची जागा घेतली होती.