IPL 2026 : 13 कोटींच्या विकेटसाठी पंत पिचवर लोळला, काव्याने डोक्याला हात लावला, Video

पहिल्या 4 विकेट स्वस्तात गमावल्यानंतर नितीश कुमार रेड्डी आणि हेनरिक क्लासेनने लखनऊच्या बॉलिंगवर आक्रमण केलं. हेनरिक क्लासेनने 41 बॉल 62 तर नितीश कुमार रेड्डीने 33 बॉल 56 रनची खेळी केली, त्यामुळे हैदराबादला 156 रनपर्यंत मजल मारता आली. रेड्डी आणि क्लासेनच्या आक्रमक बॅटिंगमुळे हैदराबादने शेवटच्या 10 ओव्हरमध्ये 122 रन केल्या.

लखनऊकडून मोहम्मद शमी हा सगळ्यात यशस्वी बॉलर ठरला. शमीने 4 ओव्हरमध्ये फक्त 9 रन देऊन 2 विकेट घेतल्या. तर प्रिन्स यादव आणि आवेश खान यांनाही 2-2 विकेट मिळाल्या. तर दिग्वेश राठी आणि मणिमरन सिद्धार्थ यांना 1-1 विकेट घेण्यात यश आलं.

आयपीएल 2026 च्या लिलावामध्ये सनरायजर्स हैदराबादने इंग्लंडचा विस्फोटक बॅटर लियाम लिव्हिंगस्टोनला 13 कोटी रुपयांमध्ये विकत घेतलं. यानंतर लियाम लिव्हिंगस्टोन हैदराबादच्या पहिल्या 2 सामन्यांमध्ये खेळला नव्हता, पण आता लखनऊविरुद्धच्या सामन्यात लिव्हिंगस्टोनला संधी मिळाली, पण त्याला मोठा स्कोअर करता आला नाही.

20 बॉलमध्ये 14 रन करून लिव्हिंगस्टोन दिग्वेश राठीच्या बॉलिंगवर आऊट झाला. लखनऊचा कर्णधार आणि विकेट कीपर ऋषभ पंत याने लियाम लिव्हिंगस्टोनचा उत्कृष्ट कॅच पकडला. राठीच्या बॉलवर स्कूप मारण्यासाठी लिव्हिंगस्टोन ऑफ स्टम्पच्या बाहेर गेला. लिव्हिंगस्टोन ऑफ स्टम्पबाहेर जाऊन लेग साईडला बॉल मारत असल्याचं लक्षात येताच पंत लेग साईडच्या दिशेला गेला, पण बॉल लेग साईडला न जाता ऑफ साईडला जातोय हे लक्षात येताच पंतने चपळता दाखवली आणि खेळपट्टीवरच उडी मारून त्याने कॅच घेतला. ऋषभ पंतची फिल्डिंग पाहून स्टेडियममध्ये उपस्थित असलेली सनरायजर्स हैदराबादची मालक काव्या मारननेही डोक्याला हात लावला.