IPL 2026 : विकेट शार्दुलची पण डाव रोहितचा... धोकादायक ऍलनला 2 बॉलमध्येच सापळ्यात अडकवला, Video

Published by:Shreyas Deshpande

Last Updated:Mar 29, 2026 8:31 PM IST

आयपीएल 2026 च्या पहिल्या सामन्यात मुंबई इंडियन्सची सुरूवात खराब झाली. टॉस जिंकून पहिले बॉलिंगचा निर्णय घेतल्यानंतर केकेआरने पॉवर प्लेमध्ये फक्त 1 विकेट गमावून 78 रन केले.

इम्पॅक्ट शॉटतुमचा गेटवे लेटेस्ट न्यूज

Translate

विकेट शार्दुलची पण डाव रोहितचा... धोकादायक ऍलनला 2 बॉलमध्येच सापळ्यात अडकवला, Video

मुंबई : आयपीएल 2026 च्या पहिल्या सामन्यात मुंबई इंडियन्सची सुरूवात खराब झाली. टॉस जिंकून पहिले बॉलिंगचा निर्णय घेतल्यानंतर केकेआरने पॉवर प्लेमध्ये फक्त 1 विकेट गमावून 78 रन केले. 5 ओव्हरमध्ये केकेआरचा स्कोअर एकही विकेट न गमावता 68 रन झाला होता, यानंतर कर्णधार हार्दिक पांड्याने शार्दुल ठाकूरच्या हातात बॉल दिला आणि शार्दुलने ओव्हरच्या दुसऱ्याच बॉलवर मुंबई इंडियन्सला पहिली विकेट मिळवून दिली.

शार्दुल ठाकूरने बॉलचा स्पीड 117 पर्यंत कमी केला ज्यामुळे केकेआरचा ओपनर फिन ऍलन याचा शॉट फसला आणि बाऊंड्री लाईनवर उभ्या असलेल्या तिलक वर्माने सोपा कॅच पकडला.

मुंबई इंडियन्सचा पहिली विकेट मिळवून दिल्यानंतर शार्दुल ठाकूर हा थेट रोहित शर्माच्या जवळ गेला आणि रोहित शर्मानेही रणनीती यशस्वी झाल्यासारखी प्रतिक्रिया शार्दुल ठाकूरकडे पाहून दिली. आयपीएलच्या या मोसमात मुंबई इंडियन्सने शार्दुल ठाकूरला लखनऊकडून ट्रेड केलं आणि शार्दुलने मुंबईला मोसमाची पहिली विकेट मिळवून दिली.

View this post on Instagram

A post shared by Star Sports India (@starsportsindia)

शार्दुल ठाकूरने यानंतर तिसऱ्या क्रमांकावर आलेल्या कॅमरून ग्रीनलाही स्लो बॉल बाऊन्सरवर पॅव्हेलियनमध्ये पाठवलं. 10 बॉलमध्ये 18 रन करून ग्रीन पॅव्हेलियनमध्ये परतला.

रोहित शर्मा मैदानात

आयपीएलच्या या मोसमात रोहित शर्मा इम्पॅक्ट सब म्हणून नाही तर प्लेइंग इलेव्हनमध्ये खेळणार आहे. मुंबई इंडियन्सचे प्रशिक्षक महेला जयवर्धने यांनी मोसमाच्या सुरूवातीलाच हे स्पष्ट केलं आहे. आयपीएलच्या मागच्या मोसमात रोहित शर्माला थोडी दुखापत होती, त्यामुळे आम्ही त्याला इम्पॅक्ट सब म्हणून खेळवलं, असं जयवर्धने म्हणाले.

रोहित शर्माला इम्पॅक्ट सब खेळवण्यावरून मोठ्या प्रमाणावर टीका झाली होती. रोहित शर्मा 5 आयपीएल ट्रॉफी आणि टी-20 वर्ल्ड कप विजेता कर्णधार आहे, त्याचा अनुभव कर्णधार हार्दिक पांड्याच्या कामी येऊ शकतो, अशा प्रतिक्रिया चाहत्यांकडून देण्यात आल्या. यानंतर महेला जयवर्धने यांनी रोहितच्या फिटनेसच्या अडचणी असल्याचं सांगितलं.

मुंबई इंडियन्सच्या टीममध्ये रोहित शर्मा आणि सूर्यकुमार यादव हे दोनच खेळाडू बॉलिंग करत नाहीत, त्यामुळे त्यांच्यापैकी एकाला इम्पॅक्ट सब ठेवावं लागत असल्याचंही जयवर्धने म्हणाले होते, यानंतर आता पहिल्या सामन्यात मुंबई इंडियन्सने सूर्यकुमार यादव याला इम्पॅक्ट सब म्हणून खेळवण्याचा निर्णय घेतला आहे.