उन्हाळ्यात कोंबड्यांना मिळेल थंडावा, अमरावतीमधील शेतकऱ्याने शोधला देशी जुगाड, Video

अमरावती : विदर्भात उन्हाळा सुरू झाला की तापमान सर्रास 40 अंशांच्या पुढे जाते. या वाढत्या उष्णतेचा परिणाम फक्त माणसांवरच नाही, तर प्राणी आणि पक्ष्यांवरही मोठ्या प्रमाणात होतो. विशेषतः पोल्ट्री व्यवसाय करणाऱ्या शेतकऱ्यांसाठी हा काळ खूपच आव्हानात्मक ठरतो. उष्णतेमुळे कोंबड्यांचा मृत्यू वाढून आर्थिक नुकसान होण्याची शक्यता असते.

अमरावती जिल्ह्यातील अंजनगाव बारी येथील प्रगतशील शेतकरी रविंद्र मेटकर यांनी या समस्येवर प्रभावी उपाय शोधला आहे. त्यांनी कोंबड्यांना उष्णतेपासून वाचवण्यासाठी कमी खर्चात दोन वेगवेगळे प्रयोग राबवले आहेत. रविंद्र मेटकर सांगतात की, त्यांच्या पोल्ट्री फार्ममध्ये सुमारे 1 लाख 80 हजार कोंबड्या आहेत. एवढ्या मोठ्या प्रमाणावर उन्हाळ्यात त्यांचे व्यवस्थापन करणे अत्यंत कठीण होते. यासाठी त्यांनी काही ठिकाणी स्वयंचलित आणि वातानुकूलित यंत्रणा बसवली असली, तरी पत्र्याच्या शेडमध्ये तापमान नियंत्रणासाठी त्यांनी स्वतंत्र उपाययोजना केल्या.