जालना बाजारात नवी तूर दाखल, कोणत्या वाणाला मिळालाय उच्चांकी दर?

जालना: सोयाबीन कापूस यानंतर तूर हे राज्यातील खरीप हंगामातील एक प्रमुख पीक आहे. डाळवर्गीय पीक असल्याने तुरीला बाजारात नेहमीच मागणी असते. सध्या बहुतांश भागातील तूर ही शेंगा भरण्याच्या अवस्थेमध्ये आहे. मात्र कोरडवाहू व लवकर येणाऱ्या तुरीच्या वाणाची सोंगणी देखील सुरू झालेली आहे. नवीन तूर जालना कृषी उत्पन्न बाजार समितीमध्ये दाखल झाली आहे. नवीन बाजारात दाखल झालेल्या तुरीला चांगला दर मिळाला असून यामुळे शेतकऱ्यांनी समाधान व्यक्त केलंय.

छत्रपती संभाजीनगर जिल्ह्यातील मंगरूळ गावच्या जिजा आबासाहेब शिंदे या शेतकऱ्याने पंचगंगा या वाणाची 9 गोण्या तूर विक्रीसाठी आणली होती. या तुरीला जालना शहरातील नव्या मोंड्यात 9 हजार 211 रुपये एवढा दर मिळाला. शिंदे यांनी एक एकर क्षेत्रावर पंचगंगा वाणाची तूर लावली होती. त्यांना एकरी 10 क्विंटलच्या आसपास उत्पन्न मिळालं. त्यापैकी त्यांनी केवळ 9 गोण्या विक्रीसाठी आणल्या होत्या.