Success Story : पारंपरिक पिकाला दिला फाटा, चिया सीड्स शेतीचा यशस्वी प्रयोग, उत्पन्न लाखात

जालना जिल्ह्यातील भाटेपुरी हे प्रल्हाद गाडे यांचं गाव. 16 एकर वडिलोपार्जित शेती. दोघे भाऊ मिळून ही शेती करत असतात. शेतामध्ये सोयाबीन, कापूस यांसारखी पारंपरिक पिके नेहमीच घेतली जातात. परंतु बापखळ येथील एका शेतकऱ्याने केलेला चिया सीड शेतीचा प्रयोग प्रल्हाद यांना आवडला. त्यांनी याच शेतकऱ्याकडून दीड किलो बियाणे खरेदी केले.

या बियाण्याची ट्रॅक्टरद्वारे पेरणी केली. एकरी केवळ दीड किलो बियाणे वापरले. पेरणीसाठी त्यामध्ये भाजलेले बाजरी वापरले. जेणेकरून पेरणी व्यवस्थित व्हावी. पीक उगवून आल्यानंतर आतापर्यंत या पिकाला पाच पाणी देण्यात आले. एक वेळा साध्या कीटकनाशकाची फवारणी करण्यात आली, तर एक वेळा खताचा डोस देण्यात आला. सध्या हे पीक बहारात असून या पिकाच्या माध्यमातून त्यांना पाच ते सहा क्विंटल उत्पादन अपेक्षित आहे.

काहीतरी वेगळं करायचं म्हणून चिया सीड्सची लागवड केली. सुरुवातीचा एक महिना शेतामध्ये मन लागत नव्हतं. पंधरा दिवसांनी खत टाकले आणि पाणी दिले, त्यानंतर पीक चांगलं जोमदार दिसू लागलं. आता मात्र पीक अगदी बहरात आहे. हा नवीनच प्रयोग असून यंदा पाच ते सहा क्विंटल उत्पादन होईल आणि एक लाखापर्यंत उत्पन्न मिळेल. शेतकऱ्यांनी वेगवेगळे प्रयोग जर केले तर शेतीमध्ये देखील चांगलं उत्पन्न मिळतं, असं प्रल्हाद गाढे यांनी लोकल 18 शी बोलताना सांगितलं.