विषमुक्त भाजीपाल्यासाठी डॉक्टरांचा उपाय, परराज्यातून मागणी, लाखोंची उलाढाल

सोलापूर – सध्याच्या काळात शेती क्षेत्रात अनेक क्रांतिकारी बदल होत असून अगदी बी-बियाणे देखील संकरित जाती विकसित करण्यात आल्या आहेत. त्यामुळे पारंपरिक भाजीपाल्याचे बी-बियाणे लोप पावत असल्याचं चित्र आहे. सोलापुरातील डॉ. संतोष थिटे हे हेच पारंपरिक भाजीपाल्याचे बियाणे जतन करण्याचा प्रयत्न करत आहेत. परसबाग, किचन गार्डन, होम गार्डन तसेच शेतकरी देखील त्यांच्याकडून बियाणे मोठ्या प्रमाणावर नेत आहे. गुजरात, गोवा, कर्नाटक सारख्या राज्यात त्यांच्या बियाण्यांचे कीट जाऊ लागले आहेत. या बियाणे विक्रीच्या माध्यमातूनते  वर्षाला 4 ते 5 लाखांची उलाढाल करत आहे. याबाबत लोकल18 शी बोलताना डॉ. संतोष थिटे यांनी माहिती दिलीये.

मोहोळ तालुक्यातील अनगरचे डॉ. संतोष थिटे यांनी वसुंधरा उद्योग समूह सुरू केला आहे. या माध्यमातून ते 100 प्रकारच्या विविध भाज्यांचे जतन, संवर्धन, प्रसार, प्रचार व विक्री करत आहेत. बाजारात उपलब्ध होणारे बियाणे हे संकरित प्रकारचे असते. पण शुध्द देशी बियाणे मिळत नाही. त्यामुळे डॉ. थिटे यांनी केवळ देशी बियाणे देण्याचे ठरवले. त्यानुसार 30 प्रकारच्या भाजीपाल्याच्या बियांचे त्यांनी एक पाकीट तयार केले. या बियांची ते विक्री करत आहेत.