SSC Exam Paper Leak: बोर्डाचा पेपर आहे की मस्करी! दहावीचा गणिताचा पेपर चक्क ३ दिवस आधीच फुटला, टेलिग्रामवर व्हायरल

अभिजीत पोते, प्रतिनिधी, पुणे: महाराष्ट्र राज्य माध्यमिक व उच्च माध्यमिक शिक्षण मंडळाच्या दहावीच्या परीक्षेत एक धक्कादायक आणि गंभीर प्रकार उघडकीस आला आहे. गणित भाग-१ आणि भाग-२ या दोन्ही विषयांच्या प्रश्नपत्रिका परीक्षा सुरू होण्यापूर्वीच 'टेलिग्राम' या सोशल मीडिया प्लॅटफॉर्मवर व्हायरल झाल्याने खळबळ माजली आहे. या प्रकरणी पुणे विभागीय मंडळाने शिवाजीनगर पोलीस ठाण्यात अधिकृत तक्रार दाखल केली आहे. बारावीच्या परीक्षेतही पेपर फुटीचा प्रकार समोर आला होता. या प्रकरणी नागपूर पोलिसांनी कारवाई केली होती. त्यानंतर आता दहावीचाही पेपर फुटल्याने चिंता व्यक्त केली जात आहे.