सोयाबीनच्या दरात पुन्हा सुधारणा! डिसेंबरच्या शेवटच्या 10 दिवसांत दर वाढणार का?

मुंबई : राज्यातील सोयाबीन बाजारामध्ये मोठा चढ उतार पाहायला मिळाला. डिसेंबरच्या तिसऱ्या आठवड्यात बहुतांश कृषी उत्पन्न बाजार समित्यांमध्ये सोयाबीनची आवक समाधानकारक राहिली. तसेच गुणवत्तेनुसार दरांमध्ये फरक दिसून आला आहे. काही बाजारांत हमीभावाच्या आसपास व्यवहार झाले, तर काही ठिकाणी उच्च दर्जाच्या सोयाबीनला चांगला दर मिळाल्याचे चित्र आहे.

advertisement

आजचे बाजारभाव काय?

20 डिसेंबर 2025 रोजी जळगाव बाजार समितीत सोयाबीनची आवक एकूण 320 क्विंटल नोंदवली गेली. येथे सामान्य प्रतीच्या सोयाबीनला थेट 5,328 रुपये प्रति क्विंटल असा स्थिर दर मिळाला. त्याच बाजारात लोकल सोयाबीनची 286 क्विंटल आवक झाली असून त्याला 4,300 ते 4,460 रुपये दरम्यान व्यवहार झाला. अकोला बाजारात पिवळ्या सोयाबीनची मोठी आवक राहिली. तब्बल 3,476 क्विंटल आवक असतानाही कमाल दर 4,635 रुपये तर सरासरी दर 4,500 रुपये नोंदवला गेला.

तर दुसरीकडे 19 डिसेंबर रोजी नाशिक जिल्ह्यातील लासलगाव आणि विंचूर परिसरात सोयाबीनच्या दरांमध्ये चढ-उतार दिसून आले. लासलगाव बाजारात 514 क्विंटल आवक झाली असून सरासरी दर 4,570 रुपये राहिला. तर विंचूर येथे काही ठिकाणी कमी प्रतीच्या मालाला 3,000 रुपयांपर्यंत घसरण पाहायला मिळाली, मात्र चांगल्या मालाला 4,625 रुपये दर मिळाला. येवला बाजारात मर्यादित आवक असूनही दर 4,430 रुपयांपर्यंत टिकून राहिले.

मराठवाडा आणि विदर्भात सोयाबीनच्या आवकीत मोठ्या प्रमाणात वाढ झाली आहे. माजलगाव बाजारात 2,014 क्विंटल आवक झाली असून सरासरी दर 4,500 रुपये राहिला. रिसोड येथे 2,200 क्विंटल आवक असून 4,685 रुपये हा कमाल दर नोंदवण्यात आला. वाशीम बाजारात पिवळ्या सोयाबीनला 5,200 रुपये प्रतिक्विंटल असा उच्चांकी दर मिळाल्याने शेतकऱ्यांमध्ये समाधानाचे वातावरण आहे.

यवतमाळ, हिंगणघाट, चिखली आणि वणी या भागांत मात्र दरांमध्ये अस्थिरता दिसून आली. यवतमाळ येथे कमाल दर 4,905 रुपये मिळाला असला तरी सरासरी दर 4,452 रुपये राहिला. हिंगणघाटमध्ये मोठी आवक असूनही काही ठिकाणी दर 3,100 रुपयांपर्यंत खाली आले. वणी बाजारात कमी प्रतीच्या सोयाबीनला 2,570 रुपये दर मिळाल्याने शेतकऱ्यांची चिंता वाढली आहे.

नागपूर, अमरावती आणि कोपरगाव बाजारांत लोकल सोयाबीनला 4,200 ते 4,450 रुपये दरम्यान दर मिळत आहेत. काही ठिकाणी अत्यल्प आवकीमुळे 5,328 रुपयांचा थेट दर नोंदवण्यात आला, जो सध्या सोयाबीनचा उच्चांकी दर मानला जात आहे.

एकूणच राज्यातील सोयाबीन बाजार सध्या गुणवत्तेवर आधारित दर ठरवत असल्याचे स्पष्ट होत आहे. व्यापारी चांगल्या दर्जाच्या, कोरड्या आणि स्वच्छ सोयाबीनला प्राधान्य देत आहेत. त्यामुळे शेतकऱ्यांनी बाजारातील परिस्थिती लक्षात घेऊन योग्य वेळी विक्रीचा निर्णय घ्यावा, असा सल्ला दिला जात आहे.