मुंबईत मुसळधार पावसाची शक्यता
मुंबईत आज काही भागांमध्ये मुसळधार ते अतिमुसळधार पावसाचा अंदाज वर्तवण्यात आला आहे. त्यामुळे हवामान विभागाने दुसऱ्या दिवशीही ऑरेंज अलर्ट जारी केला आहे. आकाश ढगाळ राहण्याची शक्यता असून, समुद्रात लाटांची उंची सुमारे 4.67 मीटरपर्यंत जाऊ शकते, असा इशारा देण्यात आला आहे. विशेषतः दुपारनंतर शहरात जोरदार पावसाच्या सरी पडण्याची शक्यता असून, यामुळे वाहतुकीवर आणि निचऱ्याच्या प्रणालीवर परिणाम होऊ शकतो.
advertisement
2019 नंतर जमीन खरेदी केलेल्या शेतकऱ्यांसाठी महत्वाची अपडेट!
ठाणे आणि नवी मुंबईतही पावसाचा जोर
नवी मुंबई आणि ठाणे या शहरांमध्ये आज जोरदार पावसाची शक्यता असून, हवामान विभागाने येथेही ऑरेंज अलर्ट दिला आहे. पावसामुळे दोन्ही ठिकाणी काही सखल भागांत पाणी साचू शकते. तसेच, पावसाचा जोर कायम राहिल्यास रस्त्यांवर खड्डे पडण्याची शक्यता आहे. त्यामुळे नागरिकांनी अत्यावश्यक कारणाशिवाय प्रवास टाळावा, असे प्रशासनाने सांगितले आहे. या स्थितीचा शाळा आणि कार्यालयांच्या कामकाजावर परिणाम होऊ शकतो.
पालघर जिल्ह्यात रेड अलर्ट, शाळांना सुट्टी
भारतीय हवामान विभागाने पालघर जिल्ह्यासाठी शुक्रवारी ऑरेंज अलर्ट जारी केला होता, तर आज 26 जुलै रोजी अतिवृष्टीचा 'रेड अलर्ट' देण्यात आला आहे. या पार्श्वभूमीवर जिल्हाधिकारी डॉ. इंदु राणी जाखड यांनी जिल्ह्यातील सर्व शाळा, अंगणवाड्या आणि महाविद्यालयांना आजच्या दिवशी सुट्टी घोषित केली आहे. सध्या जिल्ह्यात जोरदार पावसाची स्थिती असून, पुढील 24 तासांमध्ये काही भागांमध्ये अतिजोरदार पावसाचा इशारा देण्यात आला आहे. तसेच, काही धरणांमधून पाण्याचा विसर्ग वाढवण्यात आला आहे.
सिंधुदुर्ग, रत्नागिरी आणि रायगडमध्येही अलर्ट कायम
कोकणातील सिंधुदुर्ग, रत्नागिरी आणि रायगड जिल्ह्यांमध्ये मागील आठवड्यापासून ऑरेंज अलर्ट कायम आहे. आजही या भागांमध्ये जोरदार पावसाचा प्रभाव राहण्याची शक्यता आहे. विशेषतः सिंधुदुर्ग जिल्ह्यात काही ठिकाणी अतिमुसळधार पावसाचा इशारा देण्यात आला आहे. त्यामुळे डोंगराळ भागांमध्ये भूस्खलन होण्याची तसेच नदीकाठच्या परिसरात पूरपरिस्थिती निर्माण होण्याची शक्यता आहे. प्रशासनाने नदीच्या जवळील गावांमध्ये सतर्कतेचे निर्देश दिले आहेत.