जळगावच्या सुभाष यांचा नाद खुळा! शेतात केला अनोखा प्रयोग अन् ७५ दिवसांत कमावले ८.५ लाख रुपये

राहुल कोळी यांनी कृषी क्षेत्रातील शिक्षण पूर्ण केले असून, त्या ज्ञानाचा उपयोग त्यांनी थेट आपल्या शेतीत केला आहे. सुरवाडे बुद्रुक गावातील गट क्रमांक ८/९ मध्ये त्यांची सुमारे दोन एकर शेती आहे. पारंपरिक पिकांऐवजी वेगळा विचार करत, उन्हाळी हंगाम आणि बाजारातील मागणी लक्षात घेऊन त्यांनी कलिंगड लागवडीचा निर्णय घेतला. हा निर्णय त्यांच्या यशाचा पाया ठरला.

७ नोव्हेंबर २०२५ रोजी राहुल कोळी यांनी दोन एकर क्षेत्रावर कलिंगडाची लागवड केली. लागवडीपूर्वी जमिनीची तयारी, योग्य वाणाची निवड, तसेच हवामानाचा अभ्यास करण्यात आला. संतुलित खत व्यवस्थापन आणि नियोजित पाणीपुरवठ्यामुळे पीक जोमदार वाढले. विशेषतः फळधारणेच्या काळात पिकाची काळजीपूर्वक निगा राखल्याने उत्पादनाची गुणवत्ता मोठ्या प्रमाणात वाढली.

कलिंगडाचे उत्पादन चांगल्या दर्जाचे असल्याने दिल्ली येथील व्यापाऱ्यांनी थेट सुरवाडे बुद्रुक गाठले. शेतातूनच कलिंगडाची खरेदी करण्यात आली, त्यामुळे वाहतूक खर्च कमी झाला आणि मध्यस्थांचा नफा टाळता आला. याच थेट विक्रीमुळे राहुल कोळी यांना अपेक्षेपेक्षा अधिक दर मिळाला आणि उत्पन्नात लक्षणीय वाढ झाली.

बोदवड तालुका अवर्षणप्रवण म्हणून ओळखला जातो. मोठ्या नद्या, तलाव किंवा कायमस्वरूपी सिंचनाच्या सुविधा येथे फारशा उपलब्ध नाहीत. बहुतांश शेती पावसाच्या पाण्यावर अवलंबून आहे. अशा परिस्थितीत राहुल कोळी यांनी मर्यादित पाण्यात कलिंगड लागवड यशस्वी करून दाखवली आहे. त्यामुळे या भागातील इतर शेतकऱ्यांसाठीही कलिंगड लागवड हा एक प्रभावी पर्याय ठरू शकतो.

आपल्या यशाबाबत बोलताना राहुल कोळी म्हणतात की, शेतकऱ्यांनी पारंपरिक शेतीपुरते मर्यादित न राहता आधुनिक शेती पद्धती स्वीकारल्या पाहिजेत. लागवडीपूर्वी बाजारपेठेचा अभ्यास करणे अत्यंत महत्त्वाचे आहे. योग्य नियोजन केल्यास कमी कालावधीतही चांगले उत्पन्न मिळू शकते, हा अनुभव त्यांनी स्वतः घेतला आहे. ७५ दिवसांत दोन एकरातून साडेआठ लाखांचे उत्पन्न मिळाल्याने भविष्यात आणखी वेगवेगळे शेती प्रयोग करण्याचा त्यांचा मानस आहे.