शेतकऱ्यांसाठी घोषणा करण्यात आलेला 'भारत विस्तार' AI प्लॅटफॉर्म काय आहे? कोणते फायदे होणार?

शेतीची माहिती एका प्लॅटफॉर्मवर

‘भारत विस्तार’ या डिजिटल उपक्रमाअंतर्गत केंद्र सरकारच्या अ‍ॅग्री स्टॅक पोर्टलला भारतीय कृषी संशोधन परिषदेच्या (ICAR) संशोधनावर आधारित शिफारशींशी जोडले जाणार आहे. या एकत्रीकरणामुळे शेतकऱ्यांना त्यांच्या प्रदेशानुसार, पिकांच्या गरजेनुसार आणि स्थानिक हवामानानुसार अचूक कृषी मार्गदर्शन एकाच प्लॅटफॉर्मवर उपलब्ध होणार आहे.

एआयद्वारे सोपे आणि उपयुक्त मार्गदर्शन

अर्थमंत्री सीतारामन यांनी सांगितले की, हा प्लॅटफॉर्म कृत्रिम बुद्धिमत्तेच्या मदतीने पीक स्थिती, मातीचा प्रकार, हवामान बदल आणि शेतीसंबंधी इतर महत्त्वाच्या डेटाचे विश्लेषण करेल. या प्रक्रियेमुळे वैज्ञानिक माहिती शेतकऱ्यांना सहज समजेल अशा स्वरूपात आणि प्रत्यक्ष वापरासाठी उपयुक्त पद्धतीने सादर केली जाणार आहे.

advertisement

निर्णयक्षमता वाढवण्यावर भर

ICAR च्या संशोधनाधारित सल्ल्यांसह अ‍ॅग्री स्टॅकवरील डिजिटल शेतकरी नोंदी एकत्र केल्याने, शेतकऱ्यांना योग्य वेळी योग्य निर्णय घेणे अधिक सुलभ होणार आहे. पीक नियोजन, खत व्यवस्थापन, रोग नियंत्रण आणि उत्पादन वाढ यांसारख्या बाबींमध्ये हा प्लॅटफॉर्म महत्त्वाची भूमिका बजावेल, असा सरकारचा विश्वास आहे.

शेती क्षेत्राला डिजिटल बळकटी

सरकारच्या मते, ‘भारत विस्तार’ मुळे देशातील विविध कृषी-हवामान विभागांमध्ये आधुनिक आणि शाश्वत शेती पद्धतींचा अवलंब वाढेल. डिजिटल तंत्रज्ञानाच्या सहाय्याने शेती अधिक उत्पादनक्षम आणि नफ्याची करण्याच्या दिशेने हा उपक्रम मैलाचा दगड ठरेल, असेही अर्थमंत्र्यांनी स्पष्ट केले.