नवी दिल्लीतील इंडिया गेटच्या जवळ बुधवारी (24 एप्रिल) रात्री एका आईस्क्रिम विक्रेत्याची हत्या करण्यात आली. आईस्क्रिम विक्रेत्याचं नाव प्रभाकर असून तो 25 वर्षांचा होता. दिल्लीच्या संगम विहारमध्ये तो राहत होता. उत्तर प्रदेशच्या इटावा इथला तो मूळचा राहणारा होता. बुधवारी रात्री नऊच्या सुमाराला कर्तव्यपथ पोलीस स्टेशनमध्ये पोलिसांना इंडिया गेटजवळ काही मारामारी सुरू असल्याची माहिती मिळाली. त्यानंतर पोलीस घटनास्थळी गेले.
advertisement
तिथे प्रभाकर जखमी अवस्थेत पोलिसांना सापडला. त्याला तत्काळ लेडी हार्डिंग रुग्णालयात दाखल करण्यात आलं, मात्र डॉक्टरांनी त्याला मृत घोषित केलं. प्रभाकर इंडिया गेटवर आईस्क्रिम विकत असल्याचं चौकशी आढळलं, असं नवी दिल्लीचे डीसीपी देवेश कुमार महला यांनी सांगितलं. रात्री नऊ वाजता साधारण 20 वर्षांचा एक मुलगा तिथे आला व त्यानं प्रभाकरवर चाकूनं वार केले. घटनास्थळी पोलिसांना रक्त व काही चपला सापडल्या आहेत. मात्र प्रभाकरचा मोबाईल तिथे सापडला नाही. त्याच्या कुटुंबियांची चौकशी केल्यावर त्याचे एका अल्पवयीन मुलीशी संबंध असल्याचं पोलिसांना समजलं.
या घटनेचा तपास करण्यासाठी पोलिसांनी पथक तयार केलं. ती अल्पवयीन मुलगी व तिच्या नातेवाईकांच्या कॉलवर लक्ष ठेवलं. दिल्लीतल्या विविध भागांत छापेमारीही केली. आरोपी हत्या करून कुठे व कसा पळून गेला हे शोधण्यासाठी त्या भागातलं सीसीटीव्ही फूटेज तपासण्यात आलं. या चौकशीत असं आढळलं की त्या अल्पवयीन मुलीचे प्रभाकर व अजय उर्फ आकाश नावाच्या आणखी एका व्यक्तीशी संबंध होते. अजय उत्तर प्रदेशातील गोंडा इथला रहिवासी आहे.
वाचा - याच्या प्रेमात वेडी झाली, हर्षदाची झाली जीनत फातिमा; पण नंतर त्याने रंग दाखवला
प्रभाकरशी संबंध तोडण्यासाठी तिनं अजयच्या मदतीनं कट रचला आणि प्रभाकरला मारण्यासाठी अजयला फूस लावली. घटनेतील सत्य बाहेर आल्यावर पोलिसांनी अजयला पकडलं. त्याच्याकडून प्रभाकरचा मोबाईल जप्त करण्यात आला. अजय नोएडातल्या शाहपुरा इथं मलिक टेंट हाउसवर कामगार आणि ड्रायव्हर म्हणून काम करत होता.
मोबाईल कॉल, सीसीटीव्ही फुटेज, छापेमारी व घटनेतील संबंधित व्यक्तींची चौकशी करून पोलिसांनी या घटनेचा छडा लावला. आरोपी अजय व अल्पवयीन मुलीचा कट त्यामुळे उघडकीस आला. आरोपी अजयला पोलिसांनी अटक केली असून त्याच्यावर पुढील कारवाई पोलीस करत आहेत.