TRENDING:
संकेत बुगेवार असं अटक केलेल्या आरोपीचं नाव आहे. तो माजी नगरसेवक अजय बुगेवार यांचा मुलगा आहे. पोलिसांनी एमडी तस्करी करताना त्याला रंगेहाथ अटक केली आहे. तो 'थार' या कारने एमडीची डिलिव्हरी देण्यासाठी गेला होता. गणेशपेठ पोलिस ठाण्याच्या पथकाने ही कारवाई केली. रविवारी पहाटेच्या सुमारास ही कारवाई करण्यात आली. खबऱ्याकडून मिळालेल्या गुप्त माहितीच्या आधारे पोलिसांनी सापळा रचून ही कारवाई केली.
advertisement
आरोपी संकेत हा गणेशपेठ येथील मध्यवर्ती बसस्थानकासमोरील हेडाऊ रेस्टॉरंटजवळ येणार असल्याची गुप्त माहिती पोलिसांना मिळाली होती. याच माहितीच्या आधारे गणेशपेठ पोलिसांनी शनिवारी रात्रीपासूनच सापळा रचला होता. संकेत एमएच ४५ एव्ही ४५५४ ने जाधव चौकात पोहोचला. पोलिसांनी त्याला अडविले व त्याची तसेच कारची झडती घेतली. पोलिसांना त्याच्या खिशातून १६.०७ ग्रॅम एमडी पावडर आढळली. पोलिसांनी १.६७ लाखांच्या एमडी पावडर सोबत १८.१७ लाखांचा मुद्देमाल जप्त केला. आशीर्वादनगर येथील प्रणय बाजारे (२५) याने त्याला एमडी दिल्याचे संकेतने सांगितले. त्यानंतर पोलिसांनी त्याच्या घराची झडती घेतली.
पोलिसांनी आरोपीविरोधात गुन्हा दाखल करत अटक केली आहे. माजी नगरसेवक अजय बुग्गेवार यांचा मुलगा असलेला संकेत हा बॉडी बिल्डर असून जिम ट्रेनरदेखील आहे. सक्करदरा पोलीस ठाण्याच्या हद्दीतील काही एमडी तस्करांशी तो जोडला गेला होता. पोलीस त्याची सखोल चौकशी करत असून इतर कनेक्शन्स बाहेर काढण्याचा प्रयत्न केला जात आहे.