TRENDING:
सोलापूर: मैत्रिणीला मेसेज केला म्हणून संतापलेल्या तिच्या पतीने मित्रावर गोळीबार केला. बार्शीतील कुसळंब येथे हा धक्कादायक प्रकार घडला. बाळासाहेब नंदकुमार उकिरडे (वय 24) असे जखमीचे नाव असून त्याच्यावर उपचार सुरू आहेत. तर योगेश भास्कर मोरे (वय 28) याच्यासह तिघे फरार असून पोलीस त्यांचा शोध घेत आहेत.
नेमकं घडलं काय?
बार्शी तालुक्यातील कुसळंब येथे मित्राने पत्नीला मेसेज पाठवल्याच्या रागातून तिच्या पतीने टोकाचं पाऊल उचललं. पुण्यातून मित्रांसह येत बाळासाहेब उकिरडे याच्यावर गोळीबार करत लोखंडी रॉडने बेदम मारहाण केली. गुरुवारी सायंकाळी 5 वाजण्याच्या सुमारास ही घटना घडली. परंतु, दैव बलवत्तर म्हणून या हल्ल्यातून तरुणाचा जीव वाचला.
advertisement
सासऱ्याचा खून, हल्ला करणाऱ्या जावयाने स्वत:वरही वार करून घेतले, सोलापुरात खळबळ
गावकऱ्यांना धमकावले
हल्लेखोरांनी गावकरी आणि उकिरडे यांच्या कुटुंबीयांना देखील पिस्तूल दाखवत धमकावले आणि घटनास्थळावरून पसार झाले. परंतु, पुन्हा 15 मिनिटांनी येऊन ते गोळीच्या पुंगळ्या आणि रॉड घेऊन ते पुण्याकडे निघून गेले. यावेळी त्यांनी जखमीला जिवे मारण्याची धमकी दिली. बाळासाहेब उकिरडेवर बार्शीच्या खासगी रुग्णालयात उपचार सुरू आहेत. ते पोलीस भरतीचा सराव करत असून कडब्याचा व्यवसाय करतात.
फरार आरोपींचा शोध सुरू
दरम्यान, गोळीबार आणि मारहाणीच्या घटनेनंतर योगेश मोरेसह साथीदार फरार झाले. संशयितांच्या शोधासाठी फौजदार बालाजी वळसने, राजेंद्र मंगरुळे, राहुल बोंदर, तसेच स्थानिक गुन्हे शाखेचे धनाजी के कान व सिद्धेश्वर लोंढे यांची पथके रवाना करण्यात आली आहेत. आरोपी लवकरच पकडले जातील, असे पोलिसांकडून सांगण्यात आले.