मंदिर, दवाखाना, स्थानकं, सगळीकडे शोधलं पण निराशाच; अखेर 9 वर्षांपूर्वी गायब झालेली ती अचानक दारात उभा दिसली अन्...

नऊ वर्षांपूर्वी हरवलेली मुलगी अखेर सापडली

नऊ वर्षांपासून हरवलेल्या लेकीची वाट पाहणाऱ्या एका वडिलांची प्रतीक्षा अखेर संपली. रस्त्यावर भटकलेली, मानसिक आजाराशी झुंज देणारी मुलगी पुन्हा एकदा वडिलांच्या समोर उभी राहिली आणि दोघांनाही अश्रू अनावर झाले. हा भावनिक क्षण पाहून उपस्थितांचेही डोळे पाणावले. यासाठी होप पब्लिक चॅरिटेबल ट्रस्ट, चेन्नई, कर्जत येथील श्रद्धा रिहॅबिलिटेशन फाउंडेशन आणि टिटवाळा पोलिसांचे सातत्यपूर्ण प्रयत्न कारणीभूत ठरले.

advertisement

नेमके काय घडले होते?

ही मुलगी नऊ वर्षांपूर्वी बेपत्ता झाली होती. कुटुंबीयांनी जळगाव जिल्ह्यातील मुक्ताईनगर पोलीस ठाण्यात तक्रार दाखल केली होती. मंदिर, दवाखाने, रेल्वे स्थानके, पोलीस चौक्या अशा अनेक ठिकाणी शोध घेण्यात आला मात्र तिचा काहीच पत्ता लागला नाही. अनेक दिवस लोटत गेले पण कुटुंबाची आशा कायम होती.

31 मे 2022 रोजी चेन्नईतील होप पब्लिक चॅरिटेबल ट्रस्टच्या स्वयंसेवकांना ही मुलगी रस्त्यावर निराधार अवस्थेत आढळली. संस्थेने तिला तातडीने आश्रय दिला, उपचार सुरू केले आणि समुपदेशनाची प्रक्रिया राबवली. 6 जानेवारी रोजी तिला कर्जत येथील श्रद्धा रिहॅबिलिटेशन फाउंडेशनमध्ये आणण्यात आले. तेथे समुपदेशनादरम्यान तिने टिटवाळ्यातील एक पत्ता सांगितला. पत्ता अचूक नसला तरी समाजसेविका नीलम राणा शिरसाठ आणि त्यांच्या पथकाने शोध थांबवला नाही.

बाप-लेकीची गाठ घालून देणारा तो एक कॉल

अखेर टिटवाळा पोलिसांच्या मदतीने जुन्या बेपत्ता नोंदी तपासल्या गेल्या आणि मुलीच्या वडिलांचा शोध लागला. यातील एक चांगली गोष्ट म्हणजे कामाच्या निमित्ताने ते त्याच वेळी टिटवाळ्यातच उपस्थित होते. पोलिसांनी त्यांना तातडीने पोलीस ठाण्यात बोलावले आणि आवश्यक कायदेशीर प्रक्रिया पूर्ण करून मुलीला सुरक्षितपणे तिच्या वडिलांच्या ताब्यात दिले.