सांगली: हिवाळ्यात उत्तम आरोग्यासाठी आहाराकडे सर्वांचं लक्ष असतं. अनेकजण आपल्या घरात विविध प्रकारचे पौष्टिक पदार्थ बनवत असतात. अनेकजण शरीरात उष्णता निर्मितीसाठी ड्रायफ्रुट आवर्जून खात असतात. तर काही गृहिणी ड्रायफ्रुट घालून काही खास पदार्थ बनवत असतात. अशीच एक रेसिपी मनुक्यांची बर्फी होय. सांगलीतील उद्योजिका सारिका होनमाने यांनी रोगप्रतिकार शक्ती वाढवण्यासाठी मदत करणारी आणि तोंडात टाकताच विरघळणारी अशी मनुक्यांच्या बर्फीची रेसिपी सांगितली आहे.
advertisement
मनुक्याची बर्फी बनविण्यासाठी साहित्य
मनुक्याची बर्फी बनवण्यासाठी अगदी कमी साहित्य लागते. पिवळे मनुके 250 ग्रॅम, तूप - दोन चमचे, दूध पावडर 100 ग्रॅम, गुळ किंवा साखर 150 ग्रॅम, काजू किंवा बदाम- चवीप्रमाणे घ्यावेत.
आरोग्यासाठी एकदम योग्य, हिवाळ्यात करा बाजरी मेथी पराठा, संपूर्ण रेसिपी VIDEO
मनुक्याची बर्फी बनविण्याची कृती
250 ग्रॅम मनुके साध्या पाण्याने दोन-तीन वेळा स्वच्छ धुवून घ्यावेत. मनुके पाच ते सहा तास पाण्यात भिजत ठेवावेत. भिजलेल्या मनुक्यातील उरलेले पाणी काढून टाकावे आणि त्याची बारीक पेस्ट करून घ्यावी. मंद आचेवर कढई ठेवावी. गरम कढईमध्ये दोन चमचे तूप घालावे. कडलेल्या तुपामध्ये मनुक्याची पेस्ट घालावी. पेस्ट सतत परतत राहावी. थोडासा रंग बदलल्यानंतर त्यामध्ये दूध पावडर घाला.
तयार मिश्रणात नंतर बारीक चिरलेला गुळ किंवा साखर घाला. 15 ते 20 मिनिटे मंद आचेवर सर्व मिश्रण एकसारखे परतत राहावे. 15 ते 20 मिनिटात मिश्रण घट्ट येताच त्यामध्ये वेलची पावडर टाकावी. गॅस बंद करून एका ताटाला तूप लावून त्यावरती गरम मिश्रण पसरून घ्या. पसरलेल्या मिश्रणावरती काजू किंवा बदामाचे तुकडे टाकावेत. मिश्रण हलकेसे थंड होताच त्याच्या वड्या पाडाव्या. अशा प्रकारे अगदी सोप्या पद्धतीने ही रेसिपी तयार होते.
दरम्यान, मनुके हे आरोग्यासाठी लाभदायी मानले जातात. मनुक्याचे पदार्थ खाल्ल्याने थकवा कमी होतो आणि शरीराला आराम मिळतो. त्यामुळे अनेक पदार्थांत देखील त्यांचा वापर केला जातो. परंतु, फक्त मनुक्यांपासून बनणारी ही आरोग्यदायी बर्फी आपण अगदी सोप्या पद्धतीने आपल्या घरातही बनवू शकता.