Maharashtra Election : मनसेला धक्का, सर्वात तरुण महिला उमेदवाराचा अर्ज बाद; कारण आलं समोर

अकोला : राज ठाकरे यांच्या महाराष्ट्र नवनिर्माण सेनेकडून राज्यात विधानसभा निवडणुकीत २५० जागा लढवण्याची घोषणा केली होती. पण मनसेकडून १३५ उमेदवार जाहीर करण्यात आले असून त्यांनी अर्ज दाखल केले आहेत. पण मनसेला अकोला पश्चिम मतदारसंघात मोठा धक्का बसला आहे. मनसेच्या सर्वात तरुण उमेदवार म्हणून निवडणुकीच्या रिंगणात उतरलेल्या प्रशंसा अंबेरे यांचा अर्ज रद्द करण्यात आला आहे. त्यांना मनसेने अकोला पश्चिम मतदारसंघातून उमेदवारी दिली होती.

advertisement

विधानसभेच्या निवडणुकीत निवडणूक आयोगाने 25 वर्ष पूर्ण केलेल्या व्यक्तीला उमेदवार म्हणून निवडणूक लढवता येईल अशी अट आहे. अकोला पश्चिमच्या मनसेच्या उमेदवार प्रशंसा अंबेरे यांच वय 25 पेक्षा कमी असल्याने यांचा नामांकन अर्ज छाननी दरम्यान बाद करण्यात आला आहे. मनसेच्या उमेदवार असलेल्या प्रशंसा अंबेरे यांना 25 वर्ष पूर्ण होण्यासाठी 24 दिवसांचा अवधी बाकी असल्याचा कारणाने त्यांचा अर्ज रद्द केला आहे.

मनसेची घोषणा 250 ची पण प्रत्यक्षात 135 जागाच लढवणार

2009 च्या विधानसभा निवडणुकीत १३ जागा जिंकणाऱ्या मनसेला गेल्या दोन विधासनभा निवडणुकांमध्ये फक्त एका जागेवर समाधान मानावं लागलंय. आता १३५ जागा लढवणाऱ्या मनसेला किती यश मिळतं हे बघावं लागेल. गेल्या पाच वर्षात राज्यात बदललेली राजकीय गणितं. शिवसेना,राष्ट्रवादीत पडलेली फूट यामुळे मनसे कशी कामगिरी करते याकडे राज्याचं लक्ष असेल.

अकोला पश्चिममध्ये मविआ आणि महायुतीत बंडखोरी

अकोला पश्चिम मतदारसंघात मोठ्या प्रमाणावर बंडखोरी झाली आहे. महाविकास आघाडी आणि महायुतीतही बंडाचे झेंडे फडकवण्यात आले आहेत. काँग्रेसचे माजी राज्यमंत्री अहजर हुसने यांचा मुलगा झिशान हुसेन यांनी वंचितकडून उमेदवारी दाखल केलीय. तर शिवसेना ठाकरे गटाच्या राजेश मिश्रा यांनीही अपक्ष अर्ज भरला आहे. तर भाजपचे ज्येष्ठ माजी नगरसेवक हरीश आलीमचंदानी यांनी अपक्ष तर माजी शहराध्यक्ष अशोक ओळंबे पाटील यांनी प्रहारकडून उमेदवारी दाखल केलीय.