TRENDING:
पिंपरी चिंचवडमध्ये १२८ जागांसाठी निवडणूक प्रक्रिया पार पडली होती. या निवडणुकीत भाजपनं ८६ जागा जिंकत अजित पवार गटाचा सुफडा साफ केला. आता येथील आरक्षण सोडत जाहीर झालं आहे. पिंपरी चिंचवडची जागा महिला ओपनसाठी राखील सोडण्यात आली आहे.
पिंपरी चिंचवड महापालिकेत सर्वसाधारण गटातील महिला उमेदवारास महापौर पदाचा मान मिळणार आहे. पिंपरी-चिंचवडच्या १२८ सदस्यांच्या सभागृहात एकूण ६४ महिला निवडून आल्या आहेत.
advertisement
पक्षनिहाय महिलांची संख्या
भाजप: ४२ महिला उमेदवार
राष्ट्रवादी काँग्रेस (अजित पवार गट): १८ महिला उमेदवार
शिवसेना (एकनाथ शिंदे गट): ३ महिला उमेदवार
अपक्ष: १ महिला उमेदवार (शालिनी गुजर)
मोठ्या फरकाने विजयी झालेल्या महिला
भाजपच्या ७ महिला उमेदवारांनी १०,००० पेक्षा जास्त मतांच्या फरकाने विजय मिळवला. यामध्ये सारिका गायकवाड (प्रभाग ३) यांनी सर्वाधिक १६,०११ मतांच्या फरकाने विजय मिळवला. इतर प्रमुख विजेत्यांमध्ये स्नेहा कलाटे, रेश्मा भुजबळ आणि श्रुती डोळस यांचा समावेश आहे. त्यामुळे भाजप आपला पहिला महापौर सुशिक्षित आणि संघटन कौशल्य या निकषावर कुणाला निवडते याकडे सगळ्यांचं लक्ष आहे.
'दादां'चा बालेकिल्ला भाजपच्या ताब्यात
पिंपरी-चिंचवडमध्ये खरी प्रतिष्ठा पणाला लागली होती ती उपमुख्यमंत्री अजित पवार यांची. त्यांनी स्वतः १५ दिवस या भागात तळ ठोकून मेट्रो आणि मोफत बस सेवेसारखी आश्वासने दिली होती. तरीही, भाजपने ८६ जागा जिंकून 'पिंपरीत दादांऐवजी कमळ' हेच मतदारांच्या मनात असल्याचे दाखवून दिले. येथे राष्ट्रवादी काँग्रेसला ३६ जागा मिळाल्या, परंतु सत्ता स्थापनेसाठी हा आकडा अपुरा ठरला.