तुम्हाला नवीन घर खरेदी करायला परवडेल की नाही? हे २ नियम वाचल्यास लगेच समजणार

अलीकडच्या काळात परवडणाऱ्या घरांच्या (अफोर्डेबल हाउसिंग) पर्यायांमुळे मध्यमवर्गीय आणि नोकरदार वर्गाला मोठा दिलासा मिळाला आहे. मात्र प्रश्न असा असतो की, आपले उत्पन्न पाहता घर घेण्याचा निर्णय योग्य आहे का? यासाठी काही सोपे आर्थिक नियम उपयोगी ठरू शकतात.

घर खरेदीपूर्वी स्वतःला विचारा हे प्रश्न

घर घेण्याचा विचार करताना फक्त “ईएमआय जमेल का?” एवढाच विचार पुरेसा नसतो. भविष्यातील खर्च, नोकरीतील अनिश्चितता, इतर कर्जे आणि दैनंदिन गरजा यांचा विचार करणे तितकेच महत्त्वाचे असते. अशा वेळी एक सोपा आर्थिक थंब रूल तुमचा गोंधळ दूर करू शकतो.

advertisement

5–20–30–50 नियम म्हणजे काय?

हा नियम घर खरेदीची आर्थिक क्षमता तपासण्यासाठी वापरला जातो. या नियमानुसार, तुम्ही खरेदी करणार असलेल्या घराची किंमत तुमच्या वार्षिक उत्पन्नाच्या पाचपटांपेक्षा जास्त नसावी. उदाहरणार्थ, तुमचे वार्षिक उत्पन्न १० लाख रुपये असेल, तर घराची किंमत साधारणपणे ५० लाखांपर्यंत मर्यादित ठेवणे सुरक्षित मानले जाते.

दुसरा टप्पा म्हणजे कर्जाचा कालावधी. गृहकर्ज शक्यतो २० वर्षांपेक्षा जास्त काळासाठी घेऊ नये. कमी कालावधीचे कर्ज घेतल्यास व्याजाचा एकूण बोजा कमी होतो.

तिसरा महत्त्वाचा मुद्दा म्हणजे मासिक ईएमआय. तुमचा गृहकर्जाचा हप्ता मासिक उत्पन्नाच्या ३० टक्क्यांपेक्षा जास्त नसावा. यामुळे दैनंदिन खर्च आणि बचतीसाठी पुरेशी रक्कम शिल्लक राहते.

शेवटचा आणि सर्वात महत्त्वाचा नियम म्हणजे, तुमच्याकडील सर्व कर्जांची एकूण ईएमआय मासिक उत्पन्नाच्या ५० टक्क्यांपेक्षा जास्त नसावी. यामध्ये गृहकर्जासोबत वाहन कर्ज, वैयक्तिक कर्ज किंवा क्रेडिट कार्ड थकबाकी यांचाही समावेश होतो.

50–30–20 बजेट नियम कसा मदत करतो?

घर घेण्याचा निर्णय घेण्याआधी तुमचे मासिक बजेट कसे आहे, हे समजून घेणे आवश्यक आहे. 50–30–20 नियम यासाठी उपयुक्त ठरतो. या नियमानुसार, करानंतरच्या मासिक उत्पन्नातील ५० टक्के रक्कम भाडे, अन्न, वीज, पाणी यांसारख्या आवश्यक खर्चासाठी वापरावी.

३० टक्के रक्कम जीवनशैलीशी संबंधित गरजांसाठी जसे की प्रवास, मनोरंजन, खरेदी वापरावी, तर उरलेले २० टक्के बचत किंवा कर्जफेडीसाठी राखून ठेवावेत.

योग्य नियोजन केल्यास घराचे स्वप्न शक्य

जरी काही तज्ज्ञ २० टक्के बचत अपुरी असल्याचे मत मांडतात, तरी सुरुवातीस हा नियम आर्थिक शिस्त लावण्यासाठी उपयुक्त ठरतो. उत्पन्न वाढल्यानंतर बचतीचा टक्का वाढवता येतो.

थोडक्यात सांगायचे तर, घर खरेदी हा भावनिक निर्णय नसून आर्थिक गणितावर आधारित असावा. वरील नियमांचा विचार करून निर्णय घेतल्यास, भविष्यात आर्थिक ताण न घेता स्वतःच्या घराचे स्वप्न साकार करता येऊ शकते.