TRENDING:
घरगुती आणि व्यावसायिक गॅस सिलिंडरच्या दरात मोठी वाढ झाली असून, राज्यातील गॅस पुरवठा आणि टंचाईबाबत अन्न व नागरी पुरवठा मंत्री छगन भुजबळ यांनी विधान परिषदेत महत्त्वपूर्ण निवेदन दिले. नागरिकांनी घाबरून न जाता संयम राखावा, सरकार परिस्थितीवर लक्ष ठेवून असल्याचे त्यांनी सांगितले.
सिलिंडरचे नवे दर काय?
आंतरराष्ट्रीय स्तरावर इंधन पुरवठ्यावर परिणाम झाल्याने केंद्र सरकारने ७ मार्च २०२६ पासून गॅस दरात वाढ केली आहे. घरगुती सिलिंडर ८५२.५० रुपयांवरून आता ९१२.५० रुपये झाला आहे. तर, व्यावसायिक सिलिंडरचे दर १७२०.५० रुपयांवरून आता १८३५ रुपये झाला आहे.
advertisement
काळाबाजार करणाऱ्यांवर कारवाईचा बडगा
गॅस टंचाईचा गैरफायदा घेऊन काळाबाजार करणाऱ्यांविरोधात राज्य सरकारने कठोर पावले उचलली आहेत. भुजबळ यांनी सांगितले की, जिल्हास्तरावर विशेष दक्षता पथके नेमण्यात आली आहेत. १५ मार्चपर्यंत राजभरात २१२९ तपासण्या करण्यात आल्या असून, १२०८ अवैध सिलिंडर जप्त करण्यात आले आहेत. याप्रकरणी आतापर्यंत १८ जणांना अटक करण्यात आली असल्याची माहिती त्यांनी दिली.
उत्पादनात वाढ आणि पुरवठ्याचे नियोजन
गॅसचा तुटवडा भरून काढण्यासाठी रिफायनरीमधील उत्पादन ९,००० मेट्रिक टनावरून ११,००० मेट्रिक टनापर्यंत वाढवण्यात आले आहे. पुरवठ्याबाबत सरकारने प्राधान्यक्रम ठरवला असल्याचे भुजबळ यांनी सांगितले. रुग्णालये व शैक्षणिक संस्थांना १०० टक्के एलपीजीचा पुरवठा होणार आहे. तर, संरक्षण व रेल्वे या क्षेत्राला ७० टक्के प्राधान्याने पुरवठा होणार असल्याचे त्यांनी सांगितले.
एलपीजी तुटवड्यावर पर्याय काय?
एलपीजी अभावी लोकांचे हाल होऊ नये, यासाठी सरकारकडून उपाययोजना आखण्यात आल्याची माहिती अन्न व नागरी पुरवठा मंत्री छगन भुजबळ यांनी दिली. एलपीजीला पर्यायी इंधन म्हणून केरोसिन वितरण करण्याचे राज्य शासनाच्या विचाराधीन असल्याचे पत्र मुंबई हायकोर्टाच्या नागपूर खंडपीठाला पत्र दिले असल्याची माहिती भुजबळ यांनी दिली.
अफवांवर विश्वास नको...
"तेल कंपन्यांकडे पुरेसा साठा उपलब्ध आहे. तांत्रिक अडचणी दूर करून पुरवठा सुरळीत ठेवण्यासाठी पोलीस संरक्षण आणि विशेष नियंत्रण कक्ष (Control Room) कार्यान्वित करण्यात आले आहेत. त्यामुळे नागरिकांनी घाबरून साठेबाजी करू नये," असे आवाहन छगन भुजबळ यांनी केले आहे.