TRENDING:
मुख्य आरोपीचा पोलिसांना महिनाभर चकवा
या प्रकरणातील मुख्य सूत्रधार वि विशाल राठोड हा अत्यंत सराईत गुन्हेगार असल्याचं समोर आलं आहे. त्याच्यावर यापूर्वी लैंगिक अत्याचाराची तक्रार दाखल झाली होती. मात्र त्याने पैसे देऊन हे प्रकरण दाबल्याचं बोललं जात आहे. धक्कादायक बाब म्हणजे, लोंढे यांची हत्या केल्यानंतरही विशाल हा त्यांच्या नातेवाइकांसोबतच पोलीस ठाण्यात वावरत होता. "मी दोन दिवसांत त्यांना शोधून आणतो," अशी थाप मारून तो महिनाभर पोलीस आणि कुटुंबियांना गुंगारा देत होता.
advertisement
'रीलस्टार' महिला आणि राजकीय कनेक्शन
पोलिसांनी या प्रकरणात खोलात जाऊन तपास केला असता यात हनी ट्रॅप रॅकेट आणि ब्लॅकमेलिंग झाल्याची माहिती समोर येत आहे. यात गेवराई तांडा परिसरात सक्रिय असलेल्या एका मोठ्या रॅकेटचा सहभाग असावा. तसेच हर्सूलमधील काही तरुण आणि एका ब्युटी पार्लर चालक महिलेच्या माध्यमातून प्राध्यापक लोंढे यांना हनीट्रॅपमध्ये अडकवण्यात आलं होतं, असा संशय आहे. विशेष म्हणजे ज्या महिलेवर संशय आहे, संबंधित महिला ही सोशल मीडियावर 'रीलस्टार' म्हणून प्रसिद्ध असून, तिचे अनेक राजकीय नेत्यांसोबतचे व्हिडिओ चर्चेत आले आहेत. तसेच लोंढे यांचे वैयक्तिक व्हिडिओ सोशल मीडियावर व्हायरल करण्याची धमकी देऊन या टोळीने त्यांच्याकडून कोट्यवधी रुपये उकळल्याची चर्चा आहे.
पोलीस निरीक्षकावर कारवाईची मागणी
उस्मानपुरा पोलीस ठाण्याचे निरीक्षक संग्राम ताटे यांनी दीड महिना तक्रारीकडे दुर्लक्ष केले, असा गंभीर आरोप लोंढे यांचे बंधू उत्तम लोंढे यांनी केला आहे. या संतापामुळे नातेवाइकांनी सुरुवातीला मृतदेह ताब्यात घेण्यास नकार दिला होता. जोपर्यंत कर्तव्यात कसूर करणाऱ्या अधिकाऱ्यावर कारवाई होत नाही, तोपर्यंत अंत्यसंस्कार करणार नाही, अशी भूमिका त्यांनी घेतली होती. अखेर पोलीस आयुक्त प्रवीण पवार यांच्या मध्यस्थीनंतर नातेवाइकांनी मृतदेह ताब्यात घेतला.
याशिवाय या प्रकरणातील मुख्य आरोपी विशाल राठोड हा पुण्यातील काही गुन्हेगारी टोळ्यांच्या संपर्कात होता. त्याने आपल्या गावात 'लाला' नावाच्या मराठी चित्रपटाचं शूटिंगही केलं होतं. पोलीस आयुक्त प्रवीण पवार यांनी सांगितले की, "आरोपींनी सुरुवातीला खोटे जबाब देऊन दिशाभूल केली असली, तरी तांत्रिक पुराव्यांच्या आधारे पोलीस हत्येच्या मुळापर्यंत पोहोचतील."