TRENDING:
राहुल गांधींची पोस्ट काय?
“शौर्याचे मूर्तिमंत प्रतीक छत्रपती शिवाजी महाराज यांच्या जयंतीनिमित्त त्यांना त्रिवार मानाचा मुजरा! शिवाजी महाराज हे पराक्रम, दूरदृष्टी आणि न्यायप्रिय नेतृत्वाचे अद्वितीय प्रतीक आहेत. त्यांचे जीवनदर्शन आणि साहस आपल्याला आजही अन्यायाविरुद्ध लढण्याची प्रेरणा देते,” अशी पोस्ट करून राहुल गांधी यांनी छत्रपती शिवरायांना अभिवादन केलं आहे. विशेष म्हणजे त्यासोबत एक फोटो पोस्ट केला आहे.
advertisement
फोटोत काय?
राहुल गांधी यांनी सोशल मीडियावर पोस्ट केलेल्या फोटोत त्यांनी हातात शिवरायांची पूर्णाकृती मूर्ती घेतली असून ती वर उंचावलेली आहे. तसेच राहुल यांच्या डोक्यावर कोल्हापुरी फेटा आणि कपाळावर गंधही दिसत आहे. यावरून हा फोटो कोल्हापुरातील असल्याचं स्पष्ट होत आहे.
राहुल गांधी यांचा कोल्हापूर दौरा
कोल्हापुरातील कसबा बावडा येथील भगवा चौक येथे छत्रपती शिवाजी महाराज यांचा पूर्णाकृती पुतळा आहे. 6 ऑक्टोबर 2024 रोजी या पुतळ्याचे अनावरण राहुल गांधी यांच्या हस्ते झाले होते. आता राहुल गांधी यांनी सोशल मीडियावर पोस्ट केलेला हा फोटो याच कार्यक्रमातील असल्याचं दिसत आहे. खासदार छत्रपती शाहू महाराज यांच्या अध्यक्षतेखाली झालेल्या या कार्यक्रमाला काँग्रेसचे रमेश चेन्नीथला, नाना पटोले आणि माजी मुख्यमंत्री पृथ्वीराज चव्हाण, सुशीलकुमार शिंदे हेही उपस्थित होते.
शिवरायांच्या पुतळ्याचे वेगळेपण
कसबा बावडा येथील शिवरायांचा पुतळा पाचगावमधील मूर्तिकार सतीश घारगे यांनी साकारला आहे. तर आमदार सतेज पाटील हे या पुतळ्याचे संकल्पक आहेत. हा पुतळा समकालीन 16 तैलचित्रांचा बारकाईने अभ्यास करून बनवला आहे. 21 फूट उंचीचा चबुतरा असून पुतळ्याची उंची 12 फूट आहे. छत्रपती शिवरायांच्या समकालीन चित्रांमध्ये डोईवर जिगा, कलगीतूरा या शिरोभूषण मंदिल आहे. तसेच कमरेला शेला-पटक्यासह कट्यार व पाठीवर ढाल आहे. उजव्या हातामध्ये पट्टा, डाव्या हातामध्ये धोप (तलवार) आणि पायामध्ये सुंदर नक्षीकाम असलेले चढाव आहेत.
दरम्यान, राहुल गांधी यांनी सोशल मीडियावर कोल्हापुरातील तो फोटो पोस्ट केल्यानंतर सतेज पाटील यांनी देखील छत्रपती शिवाजी महाराज यांच्या पुतळ्याचे अनावरण करतानाचा व्हीडिओ शेअर केला आहे.