TRENDING:
काय आहे एल निनोचा अडथळा?
स्कायमेटचे व्यवस्थापकीय संचालक जतीन सिंग यांनी दिलेल्या माहितीनुसार, प्रशांत महासागरातील स्थिती आता बदलली आहे. गेल्या काही काळापासून अनुकूल असलेली 'ला निना' स्थिती संपून आता तिथे एल निनो सक्रिय होत आहे. नैऋत्य मान्सूनच्या सुरुवातीच्या काळातच एल निनो जास्त सक्रिय होईल, ज्याचा थेट परिणाम पावसाच्या वितरणावर होईल. ऑगस्ट-सप्टेंबर अधिक अनिश्चित आणि अनियमित राहण्याची चिन्हं आहेत. या काळात पाऊस कमी होऊ शकतो.
advertisement
पावसाची ओढ लागणार?
प्रशांत महासागरातील एल निनो पावसाला रोखत असला, तरी हिंदी महासागरातील इंडियन ओशन डायपोल काहीसा मदतीला धावून येऊ शकतो. सध्या आयओडी तटस्थ किंवा सकारात्मक राहण्याचा अंदाज आहे. जर तो सकारात्मक राहिला, तर एल निनोचा प्रभाव थोडा कमी होऊ शकतो आणि पावसाळ्याची सुरुवात चांगली होऊ शकते. मात्र, दुसऱ्या सत्रात पावसाला ग्रहण लागण्याची भीती नाकारता येत नाही.
15 एप्रिलनंतर मान्सूनचं चित्र आणखी स्पष्ट होणार
हवामान विभागाने दिलेल्या माहितीनुसार 15 एप्रिलनंतर मान्सूनबाबत आणखी चित्र स्पष्ट होण्याची शक्यता आहे. सध्या सायक्लोनिक सर्क्युलेशन आणि वेस्टर्न डिस्टर्बन्स यामुळे भारतातील हवामानात खूप मोठे आणि सातत्याने बदल होत आहेत. यावेळी मान्सून सरासरीपेक्षा कमी राहील हे खरं असलं तरी काही अंशी दिलासा मिळण्याची शक्यता आहे की नाही ते 15 एप्रिलनंतर अधिक स्पष्ट होण्याची शक्यता आहे.
स्कायमेटच्या अहवालानुसार, मध्य भारत आणि उत्तर-पश्चिम भारताला पावसाच्या तुटीचा सामना करावा लागू शकतो. महाराष्ट्राचा विचार करता, मध्य महाराष्ट्रातील शेतीसाठी हा काळ परीक्षेचा ठरू शकतो. पावसाचं वितरण हे विसंगत आणि भेदभाव करणारं असण्याची शक्यता आहे, म्हणजेच कुठं अतिवृष्टी तर कुठं कोरडा दुष्काळ, असं चित्र पाहायला मिळू शकतं.