TRENDING:
चहा पिऊन परतताना झाला भीषण अपघात
मिळालेल्या माहितीनुसार, बडनेरा येथील सात युवक रात्रीच्या वेळी फिरण्यासाठी बाहेर पडले होते. रात्री अंदाजे ११ वाजेच्या सुमारास हे सर्व जण बेलोरा विमानतळाजवळील एका हॉटेलमध्ये चहा पिण्यासाठी थांबले होते. चहा प्यायल्यानंतर ते आपल्या कारने परत येत असताना, महामार्गावर समोरून येणाऱ्या एका भरधाव ट्रकने त्यांच्या कारला भीषण धडक दिली. ही धडक इतकी जबरदस्त होती की कारचा अक्षरशः चक्काचूर झाला.
advertisement
चार तरुणांचा जागीच मृत्यू; तिघे गंभीर
अपघाताच्या वेळी कारमध्ये एकूण सात जण प्रवास करत होते. या भीषण धडकेत कारमधील चार तरुणांचा जागीच मृत्यू झाला. मोहम्मद अनस मोहम्मद सईद (वय २० वर्षे), मोहम्मद तल्हा मोहम्मद अनीस (वय २२ वर्षे), मोहम्मद अवेज मोहम्मद सईद (वय २६ वर्षे) आणि अब्दुल अन्वेस अब्दुल सलीम (वय २२ वर्षे) असं मृत पावलेल्या तरुणांची नावं आहेत. अपघातातील इतर तीन युवक गंभीर जखमी झाले असून, त्यांना तातडीने उपचारासाठी अमरावती येथील रीम्स (REIMS) हॉस्पिटलमध्ये दाखल करण्यात आले आहे. जखमींपैकी एकाची प्रकृती अत्यंत चिंताजनक असल्याची माहिती समोर आली आहे.
ट्रक चालक फरार; पोलिसांकडून तपास सुरू
अपघातानंतर ट्रकचालक घटनास्थळी न थांबता आपलं वाहन घेऊन फरार झाला आहे. घटनेची माहिती मिळताच पोलिसांनी तातडीने घटनास्थळी धाव घेत पंचनामा केला. पोलिसांनी याप्रकरणी गुन्हा दाखल केला असून, महामार्गावरील आणि हॉटेल परिसरातील सीसीटीव्ही फुटेजच्या आधारे फरार ट्रक चालकाचा शोध घेतला जात आहे.