आजचं हवामान: अरबी समुद्र खवळला, महाराष्ट्राच्या दिशेनं येतंय मोठं संकट, ४८ तास कसं राहील हवामान?

सायक्लोनिक सर्क्युलेशनचा धोका

हवामान तज्ज्ञ उमाशंकर दास यांनी दिलेल्या माहितीनुसार, दक्षिण पूर्ण अरबी समुद्रात सायक्लोनिक सर्क्युलेशन तयार झालं आहे. अरबी समुद्रात श्रीलंकेच्या दिशेकडून एक सायक्लोनिक सर्क्युलेशन पुढे सरकत आहे. या सगळ्यामुळे किमान तापमानात चढ उतार पाहायला मिळू शकतो. राज्यातील काही भागांमध्ये अंशत: ढगाळ वातावरण राहू शकतं. विशेषत: कोकण पट्ट्यात ढगाळ हवामान राहू शकतं.

advertisement

विदर्भ, मराठवाड्यात थंडीचा जोर अधिक

उत्तर भारतात सध्या कडाक्याची थंडी असून तेथून येणाऱ्या बोचऱ्या वाऱ्यांचा थेट परिणाम महाराष्ट्राच्या हवामानावर होत आहे. यामुळे प्रामुख्याने विदर्भ, मराठवाडा आणि उत्तर महाराष्ट्रात थंडीचा कडाका तीव्र असेल. रात्री आणि पहाटेच्या सुमारास किमान तापमान ८ ते १० अंशांच्या खाली जाण्याची शक्यता असल्याने नागरिकांना कडाक्याच्या थंडीचा सामना करावा लागेल.

धुक्याचाही राहणार प्रभाव

तापमानात होणाऱ्या या घसरणीमुळे उत्तर महाराष्ट्र आणि विदर्भातील काही जिल्ह्यांमध्ये सकाळी दाट धुक्याची चादर पाहायला मिळू शकते. मुंबई आणि पुण्यासह पश्चिम महाराष्ट्रातही किमान तापमानात घट होईल, ज्यामुळे गुलाबी थंडीचा अनुभव येईल.

नागरिकांना खबरदारीचे आवाहन

थंडीचा कडाका वाढणार असल्याने लहान मुले आणि वृद्ध व्यक्तींनी विशेष काळजी घेण्याचे आवाहन आरोग्य विभागाने केले आहे. पहाटे आणि रात्री घराबाहेर पडताना उबदार कपड्यांचा वापर करावा, असेही हवामान तज्ज्ञांनी सुचवले आहे. तसेच, थंडीचा परिणाम रब्बी हंगामातील पिकांवर होण्याची शक्यता असल्याने शेतकऱ्यांनी योग्य उपाययोजना कराव्यात, अशा सूचना देण्यात आल्या आहेत.