TRENDING:
पोलिसांनी दिलेल्या माहितीनुसार, नागपूर जिल्ह्यातील बोरी येथे काही आरोपींनी एका दुकानदाराला देशी कट्टा दाखवून दरोडा टाकला होता. ही घटना घडल्यानंतर आरोपी वर्ध्याच्या दिशेने पळाल्याचे पोलिसांच्या लक्षात आले. नागपूर पोलिसांनी तत्काळ वर्धा पोलिसांना याबाबत माहिती दिली. आरोपी वर्ध्यात आल्याची माहिती मिळताच वर्धा पोलिसांनी त्यांचा शोध सुरू केला.
वर्ध्याच्या स्थानिक गुन्हे शाखेच्या पथकाला आरोपी शहरातील मस्जिद चौकात असल्याची गोपनीय माहिती मिळाली. या माहितीच्या आधारे पोलिसांनी सापळा रचला आणि आरोपींना पकडण्यासाठी मोहीम सुरू केली. पोलिसांनी अत्यंत शिताफीने कारवाई करत चार आरोपींना अटक केली. अटकेचा हा थरार परिसरातील सीसीटीव्ही कॅमेऱ्यांमध्ये कैद झाला आहे. ज्यात पोलिसांनी दोन बाजुने गाड्या लावून आरोपीच्या गाडीला ट्रॅप केलं आणि त्यानंतर कारवर हल्ला करत चार जणांना ताब्यात घेतल्याचं सीसीटीव्ही कॅमेऱ्यात कैद झालं आहे.
advertisement
या कारवाईत पोलिसांनी अटक केलेल्या आरोपींकडून दोन देशी कट्टे जप्त केले आहेत. अटक करण्यात आलेल्या आरोपींची नावे रवींद्र सिंग लखन सिंग जुनी (रा. कारला चौक, हनुमानगड, वर्धा), तुषार दामोदर सहारे (रा. वार्ड नंबर चार, दुर्गा मंदिर जवळ, बुटीबोरी, नागपूर), नयन दत्ताजी कडू (रा. संयोग कॉलनी, कारला रोड, पिपरी मेघे, वर्धा) आणि कुणाल हेमने (रा. सिम्बोसिस कॉलेज जवळ, खरबी, नागपूर) अशी आहेत. यातील एक आरोपी घटनास्थळावरून पळून जाण्यात यशस्वी झाला असून, पोलीस त्याचा शोध घेत आहेत.