हत्येपूर्वी सक्षम विरोधात गुन्हा दाखल करण्यासाठी आंचलवर होता दबाव, पोलीस स्टेशनला जाऊन... नवी माहिती समोर

सक्षम ताटे याचे आंचलशी तीन वर्षांपासून प्रेमसंबंध होते. मात्र, जात वेगळी असल्यामुळे आंचलच्या कुटुंबीयांचा या दोघांच्या प्रेमसंबंधांना विरोध होता. याच वादातून आचलचे वडील गजानन मामीडवार, भाऊ साहिल मामीडवार आणि हिमेश मामीडवार या तिघांनी गोळ्या घालून आणि फरशीचे तुकडे डोक्यात घालून त्याचा खून केला. गुरुवारी हे सगळे प्रकरण समोर आले. पोलिसांनी सक्षमविरोधात माझ्या भावाला भडकवले, असा आरोप आंचलने केला आहे.

advertisement

हत्येपूर्वी सक्षम विरोधात गुन्हा दाखल करण्यासाठी आंचलवर होता दबाव

हत्येच्या काही तासापूर्वी सक्षम विरोधात पोलीस ठाण्यात गुन्हा दाखल करण्यासाठी कुटुंबाचा दबाव होता, असे आंचलने माध्यमांना सांगितले. सक्षमविरोधात गुन्हा दाखल करण्यासाठी माझ्या भावानेच मला पोलीस ठाण्यात नेले होते. मात्र मी तक्रार दिली नाही. त्यानंतर काही तासांतच त्यांनी सक्षमचा खून केला, असे आंचलने माध्यमांना सांगितले.

मयत सक्षम आणि आंचलच्या भावाचे मैत्रीचे संबंध होते. सक्षमचे आंचलच्या घरी जाणे येणे होते. तिकडेच त्यांची ओळख झाली. गेल्या तीन वर्षांपासून त्यांचे प्रेमसंबंध होते. आंचलच्या कुटुंबियांचा दोघांच्या लग्नाला विरोध होता. तो दलित आहे, आपण हिंदू आहोत, हे लग्न होऊ शकत नाही, असे आंचलला कुटुंबियांनी सांगितले होते. त्यानंतर त्याला धर्म बदलायला सांग, आम्ही तुमचे लग्न लावून देऊ, असेही कुटुंबियांनी सांगितले होते. या प्रकारानंतर मी सक्षमशी बोलले. तो लग्नासाठी धर्म बदलायला तयार झाला होता. मात्र घरच्यांनी याकडे कानाडोळा करून ठरवून सक्षमचा खून केला, असे आंचलने रडत रडत सांगितले.

मी सक्षमविरोधात गुन्हा दाखल करण्यास नकार दिल्याने....

घटनेच्या काही तासापूर्वी भावाने मला इतवारा पोलीस ठाण्यात सक्षमविरोधात गुन्हा दाखल करण्यासाठी नेले होते, पण मी तक्रार दाखल करण्यास नकार दिला. तिथे आमचे भांडण झाले. त्यानंतर मोबाईल देखील फोडण्यात आला. या भांडणानंतर माझ्या घरच्यांनी सक्षमचा खून केला, असे आंचलने सांगितले.

आठ जणांविरोधात खुनाचा आणि अॅट्रॉसिटीचा गुन्हा दाखल

दरम्यान पोलिसांनी या प्रकरणात आई वडील दोन भावासह एकूण आठ जणांविरोधात खुनाचा आणि अॅट्रॉसिटीचा गुन्हा दाखल केला आहे. आज आरोपीची तीन दिवसाची पोलीस कोठडी संपल्याने पोलिसांनी त्यांना न्यायालयात हजर करण्यात आले. न्यायालयाने चार आरोपींच्या पोलीस कोठडीत तीन दिवसांची वाढ केली. तर मुलीची जयश्री मामीडवार हिला न्यायालयीन कोठडी सुनावली.