Nanded: 'सक्षमचा गेम लावणार होते' जातीतून की दुश्मनीतून? आंचलने घरात काय घडलं ते समोर आणलं

नांदेड शहरातील जुन्या नांदेड परिसरातील मिलिंदनगर भागामध्ये गुरुवारी संध्याकाळी  सक्षम ताटे (वय २५) या तरुणाची निर्घृणपणे हत्या करण्यात आली. सक्षमची प्रेयसी आंचल मामडीवार हिने त्याच्या पार्थिवाशी लग्न केलं. एवढंच नाहीतर ती आता सक्षमच्या घरी राहण्यासाठी गेली आहे. तिने सक्षमच्या हत्येच्या आधी काय काय घडलं, वडिल काय काय बोलले, याची माहिती दिली.

advertisement

सक्षम जेलमधून आल्यावर गेम करणार होते'

'3 वर्षांपासून आमचे प्रेमसंबंध होते. पण आमचे प्रेमसंबंध हे माझे वडील गजानन मामीडवार आणि माझे दोन भाऊ हिमेश मामीडवार, साहिल मामीडवार यांनी त्याच्यावर गोळीबार करून ठार मारलं. सक्षमवर एमपीडी पडली होती. जेलमधून सुटून आल्यावर माझ्या घरचे त्याचा गेम लावण्यावर होते, असं वडील बोलले होते, मला ते धमकी देत होते, आम्ही त्याला मारून टाकणार, गोड बोलून संपवणार, नशा करून त्याला मारणार. त्याच्यावर ३ गोळ्या झाडल्या तरी त्याला काही झालं नव्हतं. तेव्हा त्याच्या डोक्यात फरशी घालून त्याला मारलं. असं सक्षमची प्रेयसी आंचल मामडीवार हिने सांगितलं.

'माझे दोन्ही भाऊ आणि सक्षम हे चांगले मित्र होते'

'आमच्यात प्रेम होतं, ते माझ्या पप्पाला मंजूर नव्हतं. त्यांना सक्षमची जात मान्य नव्हती. ते मला म्हणायचे, तू दुसऱ्या कोणत्याही मुलासोबत लग्न कर, पण सक्षमसोबत करू नको' असं सांगत होते. फक्त जात हे कारण होतं, पण त्याआधी त्यांची काही दुश्मनी होती. माझे दोन्ही भाऊ आणि सक्षम हे चांगले मित्र होते.  माझी भावना आता काहीच नाही, आम्हाला न्याय मिळाला पाहिजे. आरोपींना शिक्षा झालीच पाहिजे, आरोपींना फाशीच झाली पाहिजे.

'मी सक्षमच्या घरीच राहणार'

सक्षम आज नसला तरी काय झालं, आमचं प्रेम आहे ना, मी त्याचाशीच लग्न करेल. माझे घरचे त्याला मारून हरले आहे पण तो मरूनही जिंकला आहे. आणि मी त्याच्यासोबत लग्न करेल, त्याच्यासोबतच कायम राहिल. माझ्यावर कुणाचीही जबरदस्ती नाही. माझं वय झालं आहे, मी माझा निर्णय घेऊ शकते. मी आता सक्षमच्या घरात राहतेय आणि इथंच राहणार आहे. सक्षमच्या घरच्यांनी माझ्यावर सोडलं आहे, त्यामुळे मी इथंच राहणार आहे. माझी इच्छा आहे, मी त्याची बनून राहावं.  माझं वय कमी असलं तरी काही होत नाही. मला त्याच्यासोबत राहायचं होतं. माझ्यामुळे तो त्याच्या मम्मीपासून दूर झाला, पण आता मी सगळ्यांसोबत तरी राहिल.

गुरुवारी संध्याकाळी नेमकं काय घडलं?

सक्षम आणि आंचल मामीडवार या दोघांचे प्रेमसंबंध होते. त्यांच्या प्रेमसंबंधाला आरोपी वडील गजानन मामीडवार, दोन भाऊ हिमेश मामीडवार आणि  साहिल मामीडवार विरोध होता. मृत सक्षम हा आंचलाचा भाऊ हिमेश आणि साहिल यांचा मित्र होता. पण, आपल्याच बहिणीसोबत प्रेमसंबंध असल्यामुळे दोघांना प्रचंड राग होता. सक्षमला आंचलपासून दूर राहण्यास बजावण्यात आलं होतं. पण, गुरुवारी सक्षम आणि आंचलच्या वडील आणि भावाशी वाद झाला. त्यानंतर वाद हाणामारीवर गेलं. त्याच आरोपींनी सक्षमवर गोळ्या झाडल्या. एक गोळी ही सक्षमच्या बरगड्यात लागली होती. त्यानंतर फरशीने त्याच्या डोक्यात वार करून त्याला ठार मारण्यात आलं.