TRENDING:
अंगात बाळंतपणाची कळ आहे, शरीराला विश्रांतीची ओढ आहे, पण डोळ्यांत भविष्याचं स्वप्न घेऊन ही 'शक्ती' चक्क बारावीच्या बोर्डाच्या परीक्षेला सामोरी जात आहे. शीतल चंद्रकांत चित्ते असं या धाडसी तरुणीचं नाव आहे.
पोराला छातीशी कवटाळून पोहोचली पेपरला
शीतलने अवघ्या १० दिवसांपूर्वी एका गोंडस बाळाला जन्म दिला. बारावीची परीक्षा असल्याने ती डगमगली नाही. तिने पोराला छातीशी कवटाळलं, तिने आराम करण्याऐवजी जिद्दीनं परीक्षा केंद्रावर पेपर देण्यासाठी हजर झाली.
advertisement
विशेष म्हणजे, इंग्रजीच्या पहिल्या पेपरच्या वेळी तर बाळाचा जन्म होऊन अवघे दोनच दिवस झाले होते! टाके ओले असताना, वेदना होत असतानाही शीतलने इंग्रजीचा पेपर लिहिला आणि बुधवारी राज्यशास्त्राच्या पेपरला ती आपल्या १० दिवसांच्या तान्ह्या लेकाला घेऊनच पोहोचली.
आई पेपर लिहितेय अन् बाळ झोपी गेलं
नांदेडच्या पीपल्स कॉलेजमधील ते दृश्य पाहून अनेकांचा कंठ दाटून आला. शीतल जेव्हा बाळाला घेऊन आली, तेव्हा कॉलेज प्रशासनानेही माणुसकीचं दाखवलं. "ही मुलगी एवढ्या कष्टाने येतेय, तर आपण तिच्यासाठी काय करू शकतो?" असा विचार करून प्राचार्य डॉ. शिवशंकर भानेगावकर आणि त्यांच्या टीमने तातडीने तिथे एक 'मातृस्नेह कक्ष' तयार केला. तिथे बाळासाठी पाळणा लावला. आता शीतल तिथे शांतपणे पेपर लिहित होती आणि तिचं बाळ पाळण्यात होतं.
अधिकाऱ्यांच्या डोळ्यांतही आलं पाणी
शीतलचं दोन वर्षांपूर्वी लग्न झालंय. तिचा पती कामानिमित्त दिवसभर बाहेर असतो. घरी बाळाला सांभाळायला कोणीही नाही. अशा वेळी "बाळ लहान आहे, पुढच्या वर्षी परीक्षा देऊ" असं म्हणणं सोपं होतं. पण शीतल म्हणाली, "हे वर्ष माझ्यासाठी खूप महत्त्वाचं आहे.
हे शिक्षणच मला आणि माझ्या बाळाला उभं करेल." तिच्या या निर्णयाला सासरच्या आणि माहेरच्या माणसांनीही साथ दिली. शिक्षण अधिकारी माधव साळगर आणि इतर वरिष्ठ अधिकाऱ्यांनी जेव्हा केंद्राला भेट दिली, तेव्हा शीतलची जिद्द पाहून तेही थक्क झाले. "आम्ही अनेक विद्यार्थी पाहिले, पण अशी जिद्द कधीच पाहिली नाही," अशा शब्दांत त्यांनी शीतलचं कौतुक केलं.